Qimmini timmiarsiummik sernissorpaa
Angut utoqqasaaq Qaqortumi politiinit tigusarineqarpoq sakkut pillugit inatsimmik unioqqutitsisimasutut.
- Pisumut aallarniutaavoq inuit saneqqutilersut ilaata angutip qimmia utoqqaq isimmimmagu nilliatillugu, Qaqortumi politeeqarfimmi ulluinnarni aqutsisoq Bent Ole Kleist KNR-mut oqarpoq.
Qanoq pisoqarnera misissorniarlugu qimmiutilik illumit anisimavoq.
- Isimmitsisoq oqaluussimavaa qimmini taamaasioqqunagu, tamannali assortuunnermik kinguneqaannarsimavoq. Naggataatigut qimmiutilik illumut isersinnarluni timmiarsiummik nassarluni aneqqissimavoq. Aallaammik igittoqanngilaq aammalu allaat imassaqarani. Taamaattoq politiit ornigutsinneqarput eqqissisimasumillu qimmiutilik tigusarineqarpoq aallaallu arsaarinnissutigineqarluni, Bent Ole Kleist oqarpoq.
Suliaq suli Qaqortup politiivini suliarineqarpoq.
