Qimmillit suleqataanerulerput

Sinerissami qimmilerisut amerlanersaasa maluginiarpaat, qimmiutillit suleqataanerulernerat. Qimmiutillit puffassimaarlutik siornatigut pisaraluartut, kommunip qimmilerisuanik suleqateqarnissap pingaassusia paasiartorneqarpoq.

Taama ilaatigut oqarpoq Kangaatsiami teknikkimut pisortaq.

- Qimmit paarinerlutatut kalerriutigineqartut, maanna qaqutigoortorujussuit, assilineri kommunefogedimut politiinullu ingerlateqqittarpavut. Taakku nalilertarpaat qimmeq qanoq pineqassanersoq, Arnaarannguaq Inuusuttoq oqarpoq.

Qimminik pitussimanngitsunik toqoraaneq ingerlajuartarpoq, pingaartumik terianniamik takusoqarsimatillugu.

Sinerissami qimmilerisunut Radioavisimit paasiniaanitsinni maluginiarparput, qimminik nakkutiginnilluarnissaq eqqumaffigineqaleriartortoq, Tasiilami qimmilerisup Enok Abelsenip maluginiarpaa.

- Uagut qaqutigorsuaq suliassanngortitseqqittarpugut. Pitussimanngitsut pillugit nalunaarfigineqaraangatta inuttassarsiulertarpavut. Qimminilli paarinerluisunik tusagaqarneq ajorpugut, Enok Abelsen oqarpoq.

Sinerissami qimmilerisutut kommunini atorfillit sapinngisaminnik qimmit tamaasa aamma nalunaarsorniartarpaat, kapitinnissaat pingaaqisoq ingerlajuaannarniassammat.