Qimmerinneq ataqqinaataavoq
Kusanartunik qimmeqarneq ataqqineqaatissatut Ittoqqortoormiuni isigineqalersimavoq. Takornarianik qimussiussinerit piniartutut inuussutissarsiutilinnut siorna koruuninik millioninik ataatsinik isertitsissutaasimapput. Takornariaqarneq inuussutissarsiutitut siunissaqarluarpoq, pingaartumillu qimuttunut iluaqutaasoq, Martin Munck oqarpoq. Martin Munck, piniartutut inuussutissarsiuteqarnermi sanitigut angalatitseqatigiiffimmi Nanu Travelimi piginneqataavoq:
-Qimussiussinerit agguaqatigiissillugu ullunik tallimanik sivisussuseqartarput. Sapaatip-akunneri pingasuniit ulluinnarlugu angalanerit. Tammajuitsussarsiniarluni umimmanniarneq puisinniarnerlu aamma ingerlappagut, saniatigullu sineriak sinerlugu Liverpoollandimukartitsisarluta. Immap sikuagut qaqqatigullu qimusserneq misigisassarsiaritittarparput, Martin Munck oqarpoq.
Qimussiussinerit siorna 2006-imi assut isertitsilluassutaapput, tassami piniartutut inuussutissarsiuteqartunut koruunit 1 millionit sinneqartut akissarsiaritinneqarput.
- Isumaqarpunga aningaasarpassuit taakku inuiaqatigiinnut maani inuusunut pingaaruteqarluinnartut. Ittoqqortoormiini takornariaqartitsinermik suliaqartoq nangippoq.
Puisit, uumasullu allat amiisa akii ullumikkut pitsaavallaanngimmata qimussiussinermit isertitat qujarunneqartaqaat. Allaalluunniit qimmiginneq ataqqineqaatissatut isigineqalersoq maluginiarpaa. Qimmit kusanartuunissaannik piumasaqartarassi, aperaarput.
-Naamik, aamma eqqumiissaqaaq piniartut piumasaqarfigissagutsigit. Ittoqqortoormiini piniartut qimmiminnik paarsilluartuartuupput. Uagut aningaasarissaarnissaannut ikiuunnitsigut piniartut, ilaqutaasa qimmiisalu pitsaanerusumik atugaqarnissaannut aqqutissiuusseqataaginnarpugut. Atugarissaarnerulerneq sunut tamanut tuniluuttarpoq. Takornariat maluginiaqqissaartarpaat angallassisortik qimmiminik nakkutiginnilluartuuunersoq, unikaallannermi qimmit kukiinik isumaginnittuunersoq unnukkulluunniit innartinnani qimmiminik ilassiuisuunersoq. Ttamakkuupput takornariat maluginiaqqissaartagaat, Martin Munck oqarpoq.
Martin Munck aamma ilisimatitsivoq Illoqqortoormiunut takornariat qimusseriarniat aatsaat taama amerlatigisut ukiormanna tikissasut. Takornariat amerlanersaat Europameersuupput.
