Qimmeq sakkortuumik naalliutsinneqartoq
Sapaatip akunnerata naanerani Sisimiuni sakkortuumik qimminik naalliutsitsisoqarneratigut, qimmeq arnaviaq, anaatamik oqimaatsumik anaalerneqarnermi kinguneranik, aamminit ipisimavoq.
Allattoq Elisa Isaksen
septembarip 15-at 2010 05:43
Nutarterneqarpoq 9.37
Ilulissani uumasut nakorsaata, Sanne Wennerbergip qimmip timaa misissoreerlugu oqaatigaa, qimmip qatigaa sequminneqarsimasoq, sakiaatalu iluani puaanni uummataanilu aak katersuussimasoq.
- Qimmeq ilumigut ikilertitersimanerminit aamminit ipisimavoq. Tamannalu sakkortuumik anniaatigisimassavaa, Sanne Wennerberg KNR-imut allappoq.
Qimmeq alla qularnanngitsumik ulimaammik qanermi eqqaatigut itisuumik kilerneqarsimavoq.
Qimminik naalliutsitsisimasut tigusarisinnaanissaat, politiinit ilimagineqarpallaanngilaq. Qimminik pingasunik naalliutsitsillutik ukiut pingasut matuma siornagut toqutsisut, suli paasineqanngillat, pisumilu matumani suli pasisaqartoqarani.
