Qimmeq 21-nik piaqqisoq

Tuluit qimmiat nunarsuarmi rekordiliigunarpoq, tassami qimmeq nalinginnaasumik piaqqinermini 21-nik piaqqivoq.
Qimmeq, Mary Jane qimmini nalinginnaasumik piaqqinikuni amerlanerpaanik piaqqilluni nunarsuarmi rekordiliigunarpoq. Assi © : Iom Newspapers/Ritzau Scanpix
Allattoq Ritzau
decembarip 09-at 2019 11:38
Nutserisoq Connie Fontain

Qimmeq, Mary Jane granddanoisimik amerikamiullu bulldogianik akusaasoq novembarip ulluisa 20-anni amerlasuunik piaqqivoq.

Qimmip inuttaata, Joanne Hinep qimmini arfinilinnit arfineq-pingasunit piaqqinissaa naatsorsuutigineqaraluartoq aviisimut Independentimut oqaatigaa.

Piaqqalli 21-upput - tassalu Guinness World Recordip nalunaarsorsimasaanit, nunarsuarmi rekordiinikumit pingasunik ikinnerusunik piaqqivoq.

Rekordiliineq kingulleq 2004-meersuuvoq, tassani qimmeq 24-nik piaqqivoq. Taassumali piaqqinera pilatsinnikkut pivoq, piaqqallu 20-t uumallutik.

Independentip allaaserisaa naapertorlugu Mary Jane qimmini nalinginnaasumik piaqqinikuni amerlanerpaanik piaqqilluni nunarsuarmi rekordiliigunarpoq.

Qimmiaqqalli arfinillit piaqqiarineqarnerminni toqungapput arfineq-marlussaallu kingusinnerusukkut toqulluni.

Qimmiaqqalli sinneri 14-it ajunngillat, maannalu sukkulaatit aqqi malillugit atsersorneqarsimallutik.

/ritzau/