Qimarnguitt: Annersaasarneq naalliutsitsisarnerlu unitsinneqarlik
- Timikkut annersaasarneq aamma akuerineqarsinnaanngilluinnarpoq. Tarnikkulli annersagaasarneq inummut imminermut imaannanngitsorsuusarpoq, anniaatillu amerlasaqaat, kingunerilu imaannaanngittaqalutik, soorlu inuttut naleqassuseerunikkut. Nukissat killeqalersarput, misigissutsikkullu napparsimassutaalersarput, saaffiginnittarfiit qimarnguiillu kattuffianni siulittaasoq, Regine Enoksen, tusagassiutitigut ullumi taama allappoq.
Taamaattorli sinerissami qimarnguinnut arfiniliusunut atuisimasut 2006-imut naleqqiullugu 2007-imi ikileriangaatsiarsimapput. 2007-imi inuit katillugit 784-it atuisimapput, 2006-imi 1083-iusimallutik.
Arnat Ulluat erinarsornermik qitinnermillu naligiissitaanermut tunngasunik Nuummi kulturikkut illorsuup Katuap silataani malunnartinneqarpoq. Aaqqissuisuupput suleqatigiit 8. marsimik imminnut taasut, kommunimullu qinersinissaq naligiissitaanermullu politikki taakku alaatsinaanneruvaat.