Qimarnguimmi suleriaaseq pitsaasoq qimanneqalerpoq
Nuummi Qimarnguvimmi sullinneqartartunut periaaseq pitsaalluinnartoq ukiortamiit qimanneqartussanngorpoq kommunalbestyrelse aalajangermat Qimarnguvik matusariaqartoq.
Siulitaasuallu Nukakkuluk Kreutzmann isumaqarpoq ikiueqqaarneq qimarnguimmi atorneqartartoq qimanneqassasoq.
- Maannakkut qimarnguimmi ikiueqqaarneq tunngavigalugu sullissisarpugut, Nuup kommuneata eqqartorpaa nuunneqarpat katsorsaavittullusooq ittumik ingerlanneqalissasoq. Imaammammi qimarngusartut imaaliallaannarlutik katsorsaneqarsinnaanngillat, imaassinnaammat katsorsarneqarnissamik pisariaqartitsinngitsut, aammali eqqissisimallutik atukkatik eqqarsaatigalugit suliarinissaanut pisariaqartitsisut, Nukakkuluk Kreutzmann oqarpoq.
- Taamaattumik atugassarisaaasut annerusumik eqqaallugit allannguuteqartorujussuusussaammata akerliunerput takutinniarparput.
Maannakkut imaappoq, kikkulluunniit qaquguluunniit aasaagaluarpat juulleraluarpalluunniit maanga qimarngusinnaapput, isumassorneqarlutik oqaloqatigineqarlutillu, toqqissisimasunik atugassaqartinneqarlutik minnerunngitsumillu pikkorissunik sullinneqarlutik, Nukakkuluk Kreutzmann naggasiivoq.
Qimarnguiup siulersuisuni siulittaasup tullia Kaali Olsen aperineqarami sullisseriaaseq maanna atorneqartoq Nuup kommuneata qimanniarneraa, akivoq maluginiarsimallugu suleriaatsinik immikkoorluinnartunik marluusunik ataqatigissaariniartoqartoq.
- Ikueqqaarneq katsorsaanerlu ataatsimoorullugit ingerlannialerpaat, aap ingerlanneqarsinnaassaaq inuit pineqartut namminneerlutik nukissaqalerlutik misigippata katsorsarneqassallutik. Tamanna pissaaq inuit taakkua tassunga killiffimmut pisimappata, oqarlutik aap ilaqutariit annersaasarnerput katsorsartariaqarparput, kisiannili tamanna ikiueqqaarnermut tunnganngilaq, ikueqqaarneq kingornalu katsorsaaneq imminnut suleqatigiikutsoorsinnaapput illoqatigiinngikkaluarunilluunnit, Kaali Olsen naggasiivoq.
Nuup kommuneani isumaginninnermut pisortaq Vibeke Møller Jensen Qimarnguimmi siulersuisut eqqissisarpai, oqarluni ilaqutariit katsorneqartalernissaannut tunngasoq nutaajummat, tassungalu tapiliullugu ilaqutariit ajornartorsiortut ikiorneqarnissaat neqeroorutaasalissasoq.
- Oqanngilagut ilaqutariit katsorsarneqartarnissaat piumasarigipput. Soorunami suliani taamaattuni suut suliaralutigit nalunngilagut, aamma nalunngilarput ilaqutariippassuit katsorsarneqarnissamik pisariaqartitsisut, tamannali pinngitsaaliissutaasussaanngilaq, Vibeke Møller Jensen erseqqissaavoq.
-Pingaaruteqarluinnarpoq qimarnguittut atorneqarnissaa, aamma taamaareerpoq taamaattuaannassallunilu. Unaliuna oqaatigigipput, maanna periarfissanut ilaalertussaasoq aatsaat ilaqutariit tamarmik katsorsarneqarnissartik kissaatigigunikku, tassa anaanaq meeqqat uisorlu peqataatinneqarnerisigut, Nuup kommuneani isumaginninnermut pisortaq Vibeke Møller Jensen naggasiivoq.
Nuup kommuneani borgmesterip Agnethe Davidsenip erseqqissaatigaa, neqeroorutit ukiortaamiit atulissasut, periusaareersullu allamut nuunnermi ingerlaannassasut.
Paasisaqarnerujumagaannilu nuup kommuneata qarasaasiakkut quppersagaani takuniarneqarsinnaavoq, www.nuuk.gl fakta om Krisecenterimik allassimasumut alakkarterinikkut.
