Qimarnguiit nunatsinniittut samanersuarmiipput

Nunani avannarlerni najugallit qimarnguiini sulisut taakkununngalu attuumassuteqartut 13-issaanik arnat 200-t missaanniittut sapaatip-akunnerata naanerani Savalimmiuni ataatsimeersuarput. Marianne Sørensen nunatsinni siunnersuisarfiit qimarnguiillu kattuffianni siulittaasuusoq oqarpoq nunanut avannarlernut allanut nunarput sanilliullugu kinguarsimaneroqisoq.

- Nunani avannarlerni Qimarngueqarnerup tungaatigut atugassarititaasut pitsaanerujussuupput. Aningaasatigut politikkikkullu ikiorneqarnerat annertuneruvoq, Marianne Sørensen oqarpoq.

Taanna oqaluttuarpoq oqalugiaammini nunatsinni atugassarititaasut nassuiaatigisimagini assullu peqataasunit tusarliussani tupigusuutigineqarsimasut.

Marianne Sørensen assersuuteqarpoq, qimarnguiit pisortanut aningaasanik qinnuteqarnerini qanoq tapiiffigineqartarnerinik.

- Assersuutigalugu 1 mio. koruuninik qinnuteqarutta kommune oqassaaq 200.000 koruuninik tapiisinnaallutik aammalu Namminersornerullutik oqartussat angeqqataanik tapiisinnaasut, tassa taava katillugit 400.000 koruuniinnaat tunniunneqarsinnaapput, oqarpoq.

Taanna nangilluni oqaluttuarpoq, peqataasut qanoq tupigusutsigisimasut paasilerlugu qanoq sulisutigut ajornartorsiuteqartigisarlutik allaat qaammatini aalajangersimasuni matoqqasariqartarlutik.

- Nunatsinni qimarnueqarneq allanut sanilliullugu samanerujussuarmiippoq, Marianne Sørensen oqarpoq.

Nunat avannarlerni qimarnguiit pillugit ataatsimeersuarnissaq aappaagu nunatsinni pissaaq.