Qimagaasut ikiorneqarnissaat qulequtarineqarpoq
Imminut toquttarnerup pinaveersaartinneqarnera nunarsuarmi tamarmi ullumikkut malunnartinneqarpoq. Imminut toquttoqarnerani qimagaasut ikiorneqarnerunissaat nunatsinni qulequtaritinneqarpoq.
Allattoq Jaaku Lyberth
septembarip 10-at 2010 12:57
Imminut toquttoqarnerani qimagaasut pitsaanerusumik sullinneqarnissaat anguniarlugu kommunini sulisut toqqakkat Paarisamit pikkorissartinneqarput.
- Imminut toquttoqartillugu qimagaasut ikiorneqarnissaat pisortanit eqqumaffigineqanngitsoortarpoq. Taakku misigissutsikkut, inuiaqatigiit akornanni eqqarsartaatsikkullu kiserliorneq atugarisarpaat. Taamaattumik pikkorissartitsinermi qimagaasut ikiorneqarnissaat qulequtaritinneqarpoq, Paarisami siunnersorti Julie Dorph Lyberth oqarpoq.
Imminut toqunnissaminnik eqqarsaateqartut aamma qimagaasut oqarasuaammut Attavimmut 146-imut akeqanngitsumik sianerlutik oqaloqateqarsinnaapput. taanna sianerfigineqarsinnaavoq ataasinngornermi pingasunngornermilu unnukkut arfineq-marluniit qulingiluat tungaanut.
