Qimaasut Lesbosimi inissaannik nutaamik isumannaatsumillu sanasoqarumaartoq, Grækenlandip qimaasut pillugit ministeria Notis Mitarachi neriorsuivoq. Assi: Yara Nardi/Reuters/Ritzau Scanpix

Qimaasut najugarigallagaanni 243-t coronavirusimik tunillanneqarsimasut

Qimaasut Grækenlandimi qeqertami Lesbosimi najugarigallagaanni 240-nit amerlanerusut coronavirusimik tunillanneqarsimasut, Grækenlandimi peqqinnissaqarfik ataasinngornermi unnukkut taama nalunaaruteqarpoq.

Qimaasut Lesbosimi maannamut najugarinikuusaat Moria septembarip ulluisa qulingiluaanni nungungajavilluni ikuallammat, qimaasut tuusintilikkaat toqqinut inissinneqarallarput. Qimaasut Europami najugarisaanni taanna annerpaavoq.

Inuusuttut Afghanistanimeersut arfinillit, nunamut qimaasutut isernissamut qinnuteqaatitik itigartitsissutigineqareernerisa kingorna piaaralutik ikuallatsitsisimasutut pasineqarlutik politiinit tigusarineqarput. Taakku maanna tigummigallagaapput, pinngitsuunerarlutilli.

Nunamut qimaasutut isernissamut qinnuteqartut 7000-t akornanni misissortissimasumi 243-t coronavirusimik tunillanneqarsimasut, Grækenlandimi peqqinnissaqarfik ataasinngornermi ilisimatitsivoq.

AAMMA ATUARUK Lesbosimi qimaasut 11.000-nit amerlanerusut suli inissaqartinneqanngitsut

Ikuallatsitsinermut akisussaasuusut inatsisitigut malersorneqarumaartut, Grækenlandimilu parnaarussaaqqareerunik nunamit anisitaassasut, Grækenlandip qimaasut pillugit ministeria Notis Mitarachi Grækenlandimi inatsisartunut ataasinngornermi oqarpoq.

Qimaasut Lesbosimi inissaannik nutaamik isumannaatsumillu sanasoqarumaartoq, ministerip ilanngullugu oqaatigaa.

Tamaanili atorfilittat pilersaarutinut akerliupput, qimasut Grækenlandimit piaarnerpaamik anisitaanissaat piumasaralugu.

Nunatsinni coronavirusi pillugu
killiffik

Tunillatseqqasut 83  
Ullumi tunillatsittut 8  
Siullermik kapitissimasut 71%  
Aappassaa kapitissimasut 65%  
Tunillanneqarsimasut 787  
Uninngasut 0  
Anersaartuuteqartitaasut 0  
Toqquteqartut 0  
corona.nun.gl-imi kisitsit takukkit  
   Nutarterneqarpoq: 
Oktobarip 28-at 11:00
 

Coronavirusimik tunillatsinissaq pinaveersaaruk