Politikeri inuusuttoq: Qimaasunik tigusisinnaanngornissarput piffissanngorpoq
Qimaasunik tigusisinnaanissaq Naalakkersuisut eqqartortariaqaleraat Steve Olsvig Sandgreen isumaqarpoq, qimaasunut tunngasumik nunatsinni politikkiliortoqartariaqalersoq oqaatigalugu, qimaasunillu tigusisinnaanissaq pillugu piareersartoqartariaqalernerarlugu:
- Ullutsinni nunarsuarmi sorsuffinniit qimaasorpassuaqarpoq assersuutigalugu nunarsuatsinniit qimaasut affai sinnerlugit nunaniit pingasuninngaanneerput Afghanistanimiit, Syriamiit aamma Somaliamiit. 21,3 millionit qimaasut nunarsuarput tamakkerlugu, affai suli 18-it inorlugit ukiullit, Steve Olsvig Sandgreen oqarpoq.
Europami USA-milu qimaasunik mattussisoqartalernera maanna ajoraluartumik takussaaleraluttuinnartoq, Siumup Inuusuttunut Suleqatigiiffiata siulittaasuata oqaatigaa, imalu nangilluni:
- Nunatsinni ajornartorsiuteqarpugut kisiannili nunat tamarmik ajornartorsiuteqarput. Inoqatigut atugarliornerusut ikiortariaqarpagut. Kalaallit inuppalaartuupput katersuiniartoqaraangat katersillaqqissut, kisianni alloriaqqittariaqarpugut qimaasunillu tigusilluta, Steve Olsvig Sandgreen oqarpoq.
