Qilleriviusussani misissuineq pipallataavoq
Nunatta Kitaata imartaani uuliasiorrlerfiusuni Lady Franklinimi Atammimmilu aasarmanna qillerinerit ingerlalertorput. Misissuinissat 2002-mi aamma 2004-mi akuerineqareerput taamaattorli arlaannaannulluunniit attuumassuteqanngitsumik avatangiisinik misissuinerit suli pisimanngillat. taamaakkaluartoq qilleriffiusuni Leiv Eiriksson-imi Ocean Rig-imilu Cairn Energymit sulinertik ingerlallualereersimavaat.
DMU - Danmarkimi avatangiisinik misissuisarfik aamma Pinngortitaleriffik Aatsitassanik pisortaqarfik sullillugu qilleriffiusussamut qanittumi avatangiisit pillugit nalilersuipput avatangiisit uumasullu misissuisoqarneratigut qanoq sunnerneqarumaarnersut pisortaqarfimmut siunnersuisinnaanissartik pillugu. Arlaannaannulluunniit attuumassuteqanngitsumik misissuineq ukiuni pingasuni sivisussuseqartartoq qillerisoqalernissaata tungaanut pisarpoq.
Kitaani Sisimiut Nuullu akornanni misissuinerit nukingiunneqarput misissuinerlu ukiuni arlalinni pinani taamaallaat qaammatini pingasuni sisamanilu pivoq.
Pinngortitaleriffimmi immikkoortortaqarfimmi pisortap Fernando Ugartep suliaq "nukingiussaanerarpaa".
- Avatangiisit pillugit naliliinerit suleqataaffigisama pingajoraat. Davisstrædemi misissuinissaq januaarip naanerani nalunaarutigineqarpoq. Februaarip aallartinnerani isumaqatigiissuteqartoqarpoq maajillu naanerani misissuinerup allaaserineqarnera tunniunneqarluni. Taamaammat pilertortumik suliarineqarpoq, Fernando Ugarte oqarpoq.
Suliarmi ima nukinginnarluartigaaq allaat allaqqaagaq kisimi naammassineqarsimalluni. Ilisimasallit arlaanut attuumassuteqanngitsut naliliineri piffissakilliorneq pillugu nalunaarummi ilanngunneqanngillat.
- Uuliaarluertoqarneratigut uuliap avatangiisinik qanoq sunniiumaarnera ilaatinneqanngilaq. Avatangiisit pillugit Kalaallit Nunaanni misissuisarfik paasissutissanik Nuup Kangerluaneersunik Fyllallu ikkannersuaneersunik peqarpoq taakkuli ilanngunneqanngillat. Timmissat inaannik misissuinermi paasissutissat ilaanngillat. Mingutsitsinerup sunniutissai aamma ilaatinneqanngillat, Ugarte oqarpoq.
Tamakku ilanngunneqannginnerannut piffissaalatsineq Fernando Ugarte-p pissutaanerarpaa.
- Killilimmik piffissaqarnerput peqqutaavoq. Paasissutissarpassuit piffissaqarpiarnata allattariaqarsimavagut, taanna oqarpoq.
Qeqertarsuup kitaani, Baffinip Kangerliumarnani Tunumilu qilleriffiusussamut qanittumi avatangiisit pillugit nalilersuinerit ukiup ataatsip ingerlanerani allaganngortinneqarput. Misissueqqissaarnissanut tamatuma kingorna nalinginnaasumik aningaasaliisoqartarpoq. Taava misissuisussanik neqeroortitsisoqartarpoq taakkualu misissuiffiusussani suli misissueqqissaartarlutik.
- Qeqertarsuup Kitaani avatangiisinik ukiuni pingasuni nalilersuisoqareermat aatsaat qillerisoqarpoq. Taama sivisutiginera pissusissamisoorpoq, Fernando Ugarte oqarpoq.
Baffinip kangerliumarnani misissuinerit ukiut sisamat ingerlaneranni pipput Kitaanilu misissuinerit februaarimiit maajip tungaanut pillutik - tassa uuliasiornerup avatangiisinut, soorlu aalisakkanut timmissanullu, sunniutissai qaammatit sisamat ingerlaneranni nalilersorneqarput.
