Qillerisoqalerpat eqqagassarpassuit Aasiatsigoortinneqartassapput
Tassami qillerinerit ingerlanneqarneranni katillugit eqqagassat 277 tonsit illoqarfimmut ingerlanneqartassapput, taakkunannga eqqagassat 161 tonsit eqqagassaallutik ulorianartut.
Taakkua annertoorujussuupput, pingaartumik illoqarfimmut 3.000-inik taamaallaat inulimmut. Taamaattumik uuliamik qillerinissat pillugit Kanukokap tusarniaanermi akissutaasa taakkua ilagalugit.
Qaasuitsup Kommuniata eqqagassalerinissaq nalilersinnaanagulu piareersarsinnaanngikkaa, taamanikkut Kanukokap erseqqissarpaa, pissutigalugu Cairn Energyp kommuni attaveqarfigisimanngimmagu aammalu eqqakkat qanoq pineqarnissaannik pilersaarut naammassineqarsimanngikkuni tamanut saqqummiunneqarsimanngimmat.
Ullumikkut taakkua allanik ilisimasaqarpallaanngillat. Petúr Haukur Gudmundssonip KANUKOKA-mi ilaatigut avatangiisinut teknikkeqarnermullu siunnersortaasup suliassaq nutaarsiassartaqanngitsoq oqaatigaa, tassami ullut tallimat matuma siornagut suleqatigiinnik ataatsimeeqateqarsimagami.
Hans-Peder Christiansenip Aasianni sullissivimmi pisortaasup taamaakkaluartoq neriuutigaa eqqakkat qanoq pineqarnissaat piaarnerpaamik aaqqiivigineqarumaartoq.
- Qillerinerit taama sivikitsigisumik ingerlanneqartussaammata eqqagassat taama annertutigisut isumagisinnaanngilagut, taama oqarpoq.
Taassuma aamma oqaluttuaraa Aasianni eqqakkanut ikuallaaviup maannakkut eqqagassat sapaatip-akunnerani immikkut 10 tonsit tigusinnaasarai.
- Taamaattumik eqqakkat ikuallanniarlugit sapaatit-akunneri 30-t atortariaqassavavut, Hans-Peder Christiansen oqarpoq, kiisalu oqaatigalugu, eqqagassat erniinnaartumik peerneqarsinnaanngitsut qanoq toqqortarineqarnissaat pillugit kommunip tungaaniit siunnersuuteqartoqartoq.
Taakkua ilaat ataatsimut naqillugit annikillisinneqarsinnaapput pallettinullu iliorarneqarlutik, eqqagassalli ulorianartortallit Aasianniit ingerlanneqartassallutik.
Taakkuali suli Cairn Energymit tassa suli tusagaqarsimanngillat.
Aasianni inuussutissarsiuteqartut uuliamik qillerinissat qilanaaralugit ippassaq oqaatigaat, immaqa aningaasatigut iluaqutaasinnaanera pissutigalugu. Kisiannili qillerinissat tigussaasunik - pitsaanngitsunillu - kinguneqassapput. Tassalu eqqagassanik - eqqagassarparujussuarnik.
