Qillerinerit iluatsinngitsoorput
Siorna aasakkut qillerineq aallartinneqarmat, qallunaat qillerivissamik toqqaasut qillerivissamik kukkullutik toqqaasimasut, atuagassiami Ingeniørenimi ullumi allaaserineqarpoq.
Tassami qillerivigineqartumi kiannera aamma sermip aannera pissutigalugit sermip qaleriiaarneri paatsiveqanngillat, taamaattumillu siunertarineqaraluartutut piffissani sermersuarfiit akunnerini silap pissusaata allanngorarneri paasisaqarfigineqarsinnaanatik.
Ingeniørenimut taamatut tusarluarnanngitsumik nalunaartoq tassaavoq, sermersuarmi qillerinermi pisortaq Københavnip Universitetianeersoq Jørgen Peder Steffensen.
- Qaqitavut sammiveqartinnginnatsigik, tamannalu ajorluinarpoq, taanna nangippoq.
Sermersuarmi sermip qaleriiaarnerani sermersuaqarneranit kingullermeersunik qaqitsinissaq siunertaagaluarpoq, taamaalilluni silap pissusaata allanngorneri ullumikkornit sakkortunerulissanersut paasisaqarfigineqarsinnaaniassammata.
Qillerinerilli tassa iluatsinngitsoorput.
Taamanikkut ukiut arfinillit matuma siornagut qilleriffigineqartussaq aalajangerniarneqalermat, radarikkut uuttortaanerit ullumikkutut pitsaassuseqannginnerat, tamatumunnga pissutaavoq. Taamaattuminga qillerivissamik kukkulluni toqqaasoqarsimasoq.
Maannamulli radarikkut uuttortaanerit paasinarsisippaat, maanna qilleriviusup NEEM-ip eqqaani sermip qaleriiaarneri naqqa tikillugu innarlerneqarsimanngitsut naammattuugassaasut, qillerinerullu tamaani iluatsissinnaanissaa ilimatsaanneqarpoq.
