Qillerinerit aallartipput

Avatangiisinik illersuiniaqatigiiffimmit Greenpeacemeersut marluk uuliasiorfiup Leiv Eiriksonip uuliasiorniarneranik akornusersuisut politiinit tigusarineqarnerata kingorna, Cairn Energy uuliasiorluni qillerinini aallartippaa.

Uuliamik ujaasilluni qilleriviup aappaa Atammimmik taaguuteqartinneqartoq, Nuup avataani 160 kilometerisut avasitsigisumiittoq, aamma qilleriviup aappaa Lady Franklin-imik taasaq, Nuup avataani 300 kilometerisut avasitsigisumiittoq maanna qillerillutik aallartissimasut, uuliasiortitsivik Cairn Energy nalunaarpoq.

Qilleriviusup aappaani Atammimmik taaguuteqartinneqartumi qillerinq 905 meterisut ititigisoq tikillugu qillersoqassaaq, aappaani Lady Franklinimi 989 meterisut ititigisumi qillerisoqassalluni.

Immami itisuumi qillerisoqarnissaa avatangiisinik illersuiniaqatigiifinnit nunanit tamaneersunit aammalu Kalaallit Nunaaniittunit isornartorsiorneqarpoq.

Isornartorsiunermut patsisaavoq, siorna Mexicop kangerliumanersuani uuliasiorfimmi ajunaarnersuaqarnera.

Isornartorsiutigineqartunut ilaavoq, akuutissat aappaluttunik taagukkat avatangiisinut mingutsisinnaasut, arriitsumik nungukkiartortarnerat ernummatigineqarluni.

Danmarkimi avatangiisinut mississuiffiup Danmark Miljøundersøgelsip innersuussinera malillugu, Cairn Energyp akuutissat aappaluttunik taasat annikillisartariaqarai oqaatigineqarpoq, uuliasiortitsivilli Cairn oqarluni, Namminersorlutik Oqartussallu isumaqatigiissutigisamminni tamanna ilanngunneqanngitsoq

Atortut ajunnginnerpaat atortaralugit Cairn Energy qulakkeerinillu oqarpoq.