Qilalukkat utoqqarujussuanngortarput
Qilalukkat qernertat 100-t sinnerlugit ukioqalersinnaasarput. Biologit manna tikillugu isumaqaraluarput 50-t missaani taamaallaat utoqqaassuseqalertartut.
Eva Garde Københavnip Universititianinngaanneersoq misissuinernut uisaallaatigineqaqisunut siuttunut ilaavoq. Eva Garde qilalukkat 75-it 1993-miit 2004-p tungaanut Uummannami pisanik misissuivoq.
Qilalugaq utoqqaanerpaaq misissorneqartoq arnaviaavoq 115-nik ukiulik, angutiviarlu 84-nik ukiulik. Misissuinerni aamma paasineqarpoq arnavissat kinguaassiorsinnaalertartut arfinilinnik arfineq marlunnilluunniit ukioqaleraangamik 337 centimeterisullu takissuseqaleraangamik. Angutivissat aatsaat qulingiluanik ukioqaleraangamik kinguaassiorsinnaalertarput 338 centimeterisullu takitigileraangamik.
Qilalukkat sivisunerusumik inuusarnerannik paasisat nutaat qilalugartassiisarneq pillugu siunnersuisarnermut sunniteqassanngilaq, paasissutissat maanna pigineqalersut suli erseqqissisinngimmagu amerlasusaannut sunniuteqarnersut.
