Qilalukkat saarngi takornariat piumalluagaat
Qilalukkat qernertat neqaannik, mattaannik tugaavinillu CITES aqqutigalugu nunatsinniit avammut annisseqqusaajunnaarneq takornariaqarnermik sulialinnut eqquinerpaassaaq.
Pinngortitamut Avatangiisinullu Pisortaqarfik taama naliliivoq.
Qilalukkanik qernertanik nunatsinniit avammut tuniniaanissamut Pisortaqarfimmiit akuersissutit amerlanerpaasarput – avammut tuniniaasinnaanermut akuersissutit 2000-ngajaat 2004-mi akuersissutigineqarput, soorlu iverutit tuugaallu eqqarsaatigalugit.
Takornariat takkussuunnissaat qanillereerpoq, takkussuutilereersimanngippata, takornariallu tammajuitsussaminnik allanik nassaarsiortariaqassapput.
- Qularinngilara takornariat taamaaliussasut, tammajuitsussarserusuttaqaammi, takornariat pisiniarfigisinnaasaanni Tupilak Travelimik ingerlatsisoq, Henrik Skydsberg, oqarpoq. Qilalukkalli tuugaavinit sanalukkanik avammut annisseqqusaajunnaarnerup niuernerup tungaatigut eqquingaatsiarnissaa taassuma ilimaginngilaa.
- Illoqarfimmi najugalinnut soorunami nioqquteqartarsinnaavugut qilalukkalli tuugaavinit kusanartulianik takornarianut nioqquteqarsinnaanngikkallarluta ajoraluartumik taava oqartariaqartalissaagut. Tamakkumi tassaapput kusanartulianit erlinnarnerpaallutillu kusanarnerpaat, Henrik Skydsberg oqarpoq.
