Tunup kujataata imartaani avatangiisit ima allanngoriartupiloortigipput, allaat qilalukkat qernertat aarrillu uteqqitussaajunnaarpasillutik tamaaniikkunnaariartorlutik.Assi: Carsten Egevang

Qilalukkat qernertat Tunup kujataani takussaajunnaaraluttuinnartut

Tunup kujataaniit 4000 kilometerit sinnerlugit ungasitsigisumi silap pissusia allanngoriartormat qilalukkat qernertat aarrillu Tunup kujataani takussaajunnaaleraluttuinnarput. Imarmiulli allat soorlu aarluarsuit qipoqqaallu tamaani takussaaleraluttuinnarlutik.

Tunup kujataani avatangiisit allanngoriartornerisa unitsinneqarsinnaajunnaalernerat tamaani uumassusillit ataqatigiiaarnerisa innarlerneqangaatigigaat, Pinngortitalerifimmi ilisimatuup Mads Peter Heide Jørgensenip misissuinerani nutaami erserpoq.

Avatangiisit allanngoriartornerat unitsinneqarsinnaajunnaalertarput: silap pissusiata allanngoriartornerata malitsigisaanik, taamaattoqaraangallu pissusissamisut ileqqissinnaanngilluinnarlutilluunniit pissusissamisut ileqqikkuminaattarput

Tusarfik: DMI

- Issittumi sumiiffinni assingiinngitsorpassuarni avatangiisit allanngoriartupiloornissaat naatsorsuutigisinnaagipput misissuininni erserpoq, taanna oqarpoq.

Tunup kujataata imartaani avatangiisit ima allanngoriartupiloortigipput, allaat qilalukkat qernertat aarrillu uteqqitussaajunnaarpasillutik tamaaniikkunnaariartorlutik. Imarmiullu allat immamit kissarnerusumeersut tamaani takussaanngisaannarsimasut aamma takussaaleraluttuinnarput.

- Uumassussillit ataqatigiiaarneri mumilluinnartuusimmata, imarmiut allat tamaani takussaalerput Issittullu imarmiui takussaajunnaaleraluttuinnarlutik, Mads Peter Heide Jørgensen nassuiaavoq.

Sikorsuaasattalernera uumassusillit ataqatigiiaarnerannik allanngoriartortitsisoq

Tungujuaartorsuarmik Tunup imartaani 2012-imi avaleraasartoorniartoqarnerani siullerpaamik saniatigut pisaqartoqarpoq. Tamanna Issittup kujasinnerusortaani uumassusillit ataqatigiiaarnerisa allanngoriartupiloortussanngorneranik ersersitsivoq.

Tunup imartaani avatangiisit allanngoriartupiloornerannut allarpassuarnik aamma takussutissaqarpoq. Tassa tikaagulliusaat qipoqqaallu tamaani sikuusarnikooqisumi siornatigorninngarnit takussaanerujussuulerput. Aamma imarmiut allat immamit kissarnerusumeersut soorlu aarluarsuit, aarluit niisarnaallu aamma takussaalertut, Pinngortitaleriffik allappoq.

Tamanna Tunup imartaata sikorsuaasattarluni kissanneruneranik peqquteqarpoq. Tamaani ukiuni kingullerni 20-ni aatsaat taama sikorsuaasatsigisalersimasoq, qanoq sikorsuaqartigineranik ukiuni kingullerni 200-ni nalunaarsukkani erserpoq.

- Tunup kujataani avatangiisit allanngoriartupiloornerat Alaskap sineriaata sikusalersimanera Alaskap sineriaaniit 4000 kilometerit missaannik ungasitsigisumi, tassa Tunup kujataata uumasoqarneranut qanoq sunniuteqartiginera soqutiginarluinnarpoq.

- Tamakkuami silap pissusiata allanngoriartornerata ilimasuutiginngisatsinnik qanoq kinguneqarsinnaatigineranik ersersitsivoq, Mads Peter Heide Jørgensen oqarpoq.

Nunat Avannarliit Siunnersuisoqatigiivi immami avatangiisit ataqatigiiaarnerisa allanngoriartornerat Tunumilu aalisarnerup imminnut qanoq ataqatigiitsiginerannik misissuisitsisuupput.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl