Qilalukkat qernertat saarnginit sanalukkat tunisaaneri EU-mit akornuserneqarsinnaapput
Sanalukkanik tuniniaasartut sanaluttartullu qiimmaallakkaluarput, biologit ilisimatitsimmata qilalukkat qernertat nungutaasinnaanissaat ulorianartorsiorunnaartoq. Taamaasilluni Naalakkersuisut sanaalukkanik qilalukkat qernertat kigutaannik saarnginillu sanaanik annissisinnaanngortitseqqinneq atulerseqqissagaat amerlanerit naatsorsuutigaat. Imaaliallaannagassaanngilarli, naalakkersuisut siuliisa nammineerlutik avammut tunisinissaq inerteqqutinngortippaat piumaffigineqarnatik avataaniit, taamaasiorsimaneralli massakkut naalakkersuisut imaaliallaannaq atorunnaarsissinnaanngilaat.
Amalie Jessen, Aalisarnermut Piniarnermullu Naalakkersuisoqarfimmi pisortaq oqarpoq, Cites ammaaqqinnissamut atorunnaartitsinissamullu akuersisartut ajornartorsiortitsinavianngitsut, kisiannili EUmi akuersisartut atorunnaarsitsinissaraluamut ajornarsaartitsisinnaapput.
Taamaammat Namminersorlutik Oqartussaqarfimmi atorfilittat misissuileruttorput inerteqquteqarnermut atorunnaarsitsinissamut periarfissanik misissuillutik. Taamaammat aalajangiinissaq imaaliallaannaq Naalakkersuisunut anngukkallarnavianngilaq, naak, naalakkersuisut inerteqqummut atorunnaarsitsisussaagaluartut.
