Qilalukkat qernertat pisarineqarsimasut kisinneqarput
Qilalukkat qernertat Aasiaat aqutsiveqarfiani 20-it ukioq manna pisassiissutigineqarput. Qilalukkanik qernertanik piniarneq maannakkut unitsinneqarallarpoq.
Allattoq Ludvig Siegstad
februaarip 08-at 2012 06:36
Maannamuugallartoq pisarineqarsimasimasut kiseqqissaarneqassammata qernertanik qilalugarniarneq unitsinneqarallartoq, Qaasuitsup kommuniata Aasianni piniarneq aalisarnerlu pillugu pisortaanit ilisimatitsissutigineqarpoq.
PâviâraK`Jakobsenip nalunaarutigaa aqutsiveqarfimmi inussutissarsiutigalugu piniartutut 2011-mi allagartallit 70-usut. Taakku piniassagunik angallateqartariaqarput angallammik 14 meterinik anginerunngitsumik, piniarsinnaanermullu aamma akuersissuteqartariaqarlutik.
Sumiiffimmi pineqartumi qilalukkat qaqortat 15-it pisassiissutaapput. Taakku ataasiinnarmik maannamut ilanngarneqarsimasut, PâviarâK´Jakobsen ilisimatitsivoq.
Nunaqarfiit aqutsiveqarfimmut Aasiannut Kitsissuarsuit Akunnaarlu ilaapput.
