Qilalukkat qernertat pillugit aalajangerneq aalassaataavoq
Nunavummi qilalukkat qernertat tuugaavisa nunanut allanut tuneqqusaajunnaarnerannut inatsit qanittumi atulersinneqartoq sakkortuumik akerlerineqarpoq.
CBC Newsimi taama allaaserinnittoqarpoq.
Nunavummi sumiiffinni assigiinngitsuni 17-ini qilalukkat qernertat tuugaavi nunanut allanut tunineqarsinnaajunnaarput - illoqarfiillu pingaarnersaat Iqaluit eqqugaasunut ilaavoq.
Nunanut allanut tuniseqqusiunnaarnissaq decembarimi tusarliunneqarpoq, taamaasillunilu kinguaariinni arlalinni aningaasarsiutaasarsimasup kipitinneqarnerani inuit tusaaniarneqarsimanngitsutut misigipput.
Tuugaanik tuniseqqusiunnaartoqarnera naalagaaffimmit oqaatigineqarpoq, sumiiffinni taagorneqartuni nungusaataanngitsumik pinialunnerup ingerlanneqarsimannginnera pissutaalluni. Nunanut allanut tuniseqqusiunnaarnissaq aalajangerneqarsimanngikkaluarpat nunanit allanit tuugaat pisiariumaneqarnavianngitsut nalilersorneqarsimavoq, piniapiluttoqarsimanera pissutaalluni.
Inuit Tunngavimmi præsidenti, Cathy Towtongie, isumaqarpoq, tuniseqqusiunnaarneq paasissutissanik amigaateqartoqarnera pissutigalugu tuugaanik tunisisinnaaneq kipitinneqartoq, aamma isumaqarnerarluni, qilalukkat qernertat nungunnissaminnut navianartorsiunngitsut. oqartussaasut siornatigut oqaatigereeraat.
Oqartussaasulli isummiussimasartik allanngortinngilaat, aatsaallu qilalukkat qernertanik piniarnerit ikilineqassappata, imaluunniit misissuinerit nutaat takutissappassuk, qilalukkat qernertat amerlisimasut aatsaat isummiussimasartik aatsaat allanngortissinnaallugu.
Sumiiffinni 17-ini piniartut eqqugaasut qilalukkat tuugaavinik Canadap iluani suli tunisisinnaatitaapput. Nunavummi qilalukkap tuugaava meterimut 450 dollarsinik naleqarpoq.
CITES-imi inatsisit Kalaallit Nunaanni qanoq annertutigisumik qilalukkat qernertat tuugaavinik tunisisoqarsinnaanera aamma killilersorpaat.
