Qilalukkat qernertat ilaatigut ataatsimiissutigineqassapput

CITES-ip uumasunut tunngasunik ataatsimiititaliaata, Animal Commitee-p, sapaatip akunnerata tulliani Scweizimi Genéve-mi ataatsimiilerpat, ilaatigut qilalukkat qernertat sammissavaat.

Ataatsimiititaliap aalajangiiffigisussaavaa qilalukkat qernertat misissugassanut ilaatinneqassanersut.

Uumasut pissuseqatigiiaat, qulit sukumiinerusumik misissorniarneqarput. Taakkuninnga niiverniartoqassappat amerlassutsimikkut innarlerneqarsinnaassanersut misissorniarneqarami.

Kalaallit Nunaanni qilalukkat qernertat pillugit inatsisit allanngortinneqaqqammerput, pisassarititat aalajangerneqartalerlutik.

Taamaaliornikkut qilalukkanik qernertanik nioqqutissiorneq piujuaannartitsinissaq pillugu ingerlanneqarsinnaalernissaa anguniarneqarpoq.

Aalisarnermut piniarnermullu pisortaqarfimmi pisortaq Amalie Jessen, allaffimmilu pisortaq Ole Heinrich, CITES-ip ataatsimiinnerani peqataassapput.

Ataatsimiinnermi Pinngortitaleriffik aamma peqataatitaqassaaq, biologi ataaseq ataatsimeeqataassagami.