Qilalukkat qernertat Canadami marloriaammik amerlanerupput

Misissuinerit nutaat ersersippaat, qilalukkat qernertat amerlassusaat maannamut ilimagineqaraluartuniit marloriaammik amerlassuseqartut.
Allattoq Elisa Isaksen
apriilip 11-at 2010 13:26

Canadamiunut piniartunut nuannersumik nutaarsiassaqarpoq, tassami nutaamik misissuinertigut paasineqarpoq, qilalukkat qernertat amerlassusaat naatsorsuutigineqaraluartuniit marloriaammik amerlassuseqartut. Qilalukkat qernertat Canadap issittortaaniittut 30.000-it missaanniinnissaat siornatigut naatsorsuutigineqaraluarpoq. Pierre Richards, Canadami Aalisarnermut imartanullu qullersaqarfimmeersoq siuttoralugu, ilisimatuut qilalukkanik qernertanik kisitseriaaseq nutaaq nassaarisimavaat. Ilisimatuut misissuisut immikkut ilisimasalinnik USA-meersunik Nunatsinneersunillu suleqateqarput.

Periaatsini nutaani ilaatinneqarput timmisartumit nakkutiginninneq kisitsinerlu aamma qilalukkanik qernertanik nalunaaqutsersuineq. Misissuinikkut paasineqarpoq qilalukkat qernertat 60.000-it missaanniissasut. Misissuinermi atuagassiami Arctic-imi saqqummiunneqartumi oqaatigineqarpoq, "qilalukkat qernertat maannamut naatsorsuutigineqaraluartunit amerlanerusut, paasisallu eqqoqqissaartumik oqaatigineqarsinnaanngikkaluartut, qilalukkat qernertat amerlaqisut paasineqarpoq, taamalu piniarneqangaatsiaraluarunilluunniit tamanna amerlassusaannut akornutaanavianngitsoq.

Misissuinertigut siornatigut ingerlanneqartartutigut paasineqarpoq, qilalukkat qernertat uumasuni silap pissusaata allangoriartorneranut malussarinnerpaanut ilaasut, tassami siku saappallaaleraangat allamut nuuttaramik. Taamaattumik misissuinermi nutaami paasineqartoq, tassa qilalukkat qernertat nungutaaqqajaannginnerat, Akilinermi piniartunut nutaarsiassaavoq pitsaasoq - aamma kalaallinut.