Aqutsiveqarfimmi Upernavimmi qernertanik qilaluartoqarsimasoq, Aalisarnermut, Piniarnermut Nunalerinermullu Naalakkersuisoqarfimmut pingasunngornermi unnukkut sisamanngornerullu unnuaani nalunaarutigineqarpoq. Toqqorsivimmit assi.

Qilalukkat qernertartassat sinnerlugit pisaqartoqarsoralugu piniarneq unitsississimagaat

Oqartussat aqutsiveqarfimmi Upernavimmi qernertanik qilalugartoqarpallaarsimanissaa aarleqqutigimmassuk qernertanik qilalugarniarneq unitsippaat. Kisianni ammaqqippaat.

Aqutsiveqarfimmi Upernavimmi qernertanik qilalugartoqartarsimasoq, oqartussat ulluni kingullerni tusatsiartarpaat.

Qernertanilli qilalugarsimanermik aallaqqaammut nalunaartoqarani. 

Taamaattumik Aalisarnermut, Piniarnermut Nunalerinermullu Naalakkersuisoqarfiup taakkuninnga pisaqarpallaarnissaq ingalanniarlugu aqutsiveqarfimmi Upernavimmi qernertanik qilalugarniarneq sisamanngornermi ualikkut unitsippaa.

Qernertanik qilalugarniat nalunaarnissaannut periarfissikkumallugit taamaaliorpoq.

Qernertanilli qilalugartassat suli tamakkerneqaqqajarsimanngillat. Taamaammat qernertanik qilalugarniarneq tallimanngornermi nalunaaqutaq ullup qeqqanut ammaqqippoq, immikkoortoqarfimmi pisortaq Amalie Jessen ilisimatitsivoq:

- Aqutsiveqarfimmi Upernavimmi qilalukkanik qernertanik pisassiinerup unioqqutinneqannginnissaa qulaakkeerusullutigu immikkut iliuuseqarpugut, taanna oqarpoq.

- Aqutsiveqarfimmi Upernavimmi siornatulli piniapilunnginnissaq qulakkeerusukkatsigu, immikkoortortaqarfimmi pisortaq oqarpoq.

Qilalukkanik qernertanik 34-nik siorna pisaqartoqarpallaarsimasoq nalunaarsukkani takuneqarsinnaavoq.

Siorna piniapilunneqarsimasut

Aqutsiveqarfimmi Upernavimmi qilalukkat qernertartassat katillutik 38-upput, taakkunannga Upernavimmi quliullutik.

Aqutsiveqarfimmi Upernavimmi qilalukkat qernertat arfinillit pisarineqarsimanerat naalakkersuisoqarfimmut unitsitsigallannginnermi nalunaarutigineqarput, taakkunannga tallimat Upernavimmi ataaserlu Aappilattumi pisaallutik. 

Naalakkersuisoqarfimmulli sisamanngornermi pisortatigoortuunngitsumik nalunaarutit naapertorlugit pingasunngornermi unnukkut sisamanngornerullu unnuaani ullukkuanilu qernertanik qilaluartoqarsimavoq.

Taamaattumik pisassiissusiussat arajutsisamik tamakkertoorneqarnissaat naalakkersuisoqarfiup aarleqqutigaa.

AAMMA ATUARUK Kommune Qeqertalimmi sunngiffimmi piniartut qilalugartassaat tamakkerneqartut

Taamaammat naalakkersuisoqarfiup qernertanik qilalugarniarneq unitsikkallarpaa. Oqartussat taamaalillutik qernertanik qilalugarniartut nalunaaruteqarnissaannut periarfissippaat, qernertartassallu tamakkerneqarsimannnginnissaat qulakkeerlugu.

Upernavimmi qernertanik marlunnik allanik qilalugartoqarsimasimasoq tallimanngornermi ualikkut nalunaarutigineqarpoq.  

- Piniarnermik unitsitsigallarnitsinni, pisat marluk allat nalunaarutigineqarput, tassalu Upernavimmi qernertanik qilalugartatut maannamut nalunaarutigineqartut arfineq marlunngorsimalerput. Tassa imaappoq, qernertanik qilalugartassani sinneruttut pingasuupput. Aqutsiveqarfillu Upernavik ammaqqipparput, immikkoortortaqarfimmi pisortaq oqarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat