Qilalukkat qaqortat imartarujussuarmi eqqissisimatinneqalersut
Imartaq pineqartoq miluumasunut imarmiunut ataatsimut isigalugu pingaaruteqarpoq, pingaartumillu qilalukkanut qaqortunut pingaaruteqarluni. Qilalukkammi qaqortat tamaani piaqqiortarput, soorlu aamma qilalukkat qaqortat Inuvialunnut pingaaruteqartut.
Imartap eqqissisimatitsivinngortinneqartup taaguutaa tassaavoq Anguniaqvia, nannunillu puisinillu peqarluarnermi saniatigut timmissanik aalisakkanillu ulikkaarpoq, qilalukkallu qaqortat 40.000-it pallillugit aasaanerani tamaani aamma takussaasarlutik. Tassa qilalukkat qaqortat nunarsuarmi nassaassaasut sisamararterutaat aasaaneranit tamaaniittarlutik.
- Imartaq immikkuullarilluinnarpoq, Chris Debicki, Oceans North Canadami suliniutinut ataqatigiissaarisoq, oqarpoq, nangillunilu:
- Imartaq miluumasunut imarmiunut pingaaruteqaannanngilaq, tamaanili innuttaasunut aamma pingaaruteqarpoq, Debicki oqarpoq.
Canadap ilaani Northwest Territoriesimi illoqarfeeqqat ilaanni Paulatukimi innuttaasut piniarsinnaatitaassapput, assersuutigaluguli kilisaatinut suliffissuaatigisunut, uuliasiorlunilu gassimik qalluinermut atorneqaqqusaanani.
Imaatigulli angallattoqarsinnaassaaq, malitsigisaanillu annaassiniarnermut soorunami atorneqarsinnaassalluni, umiarsuillu assartuisartut tassuunaarsinnaassallutik.
Arfernik takornariartitsisoqarsinnaassaaq, akuersissuteqaraanni, takornariartitsinerillu uumassusilinnut akornutaassanngippat.
