Qilalukkat piaqqat unioqqutitsilluni pisarineqarsimapput
Qilalukkanut pisarineqarsimasunut ilanngullugit piaqqat marluk pisarineqarsimapput, naak arnavissat piaqqallu piniaqqusaanngikkaluartut. Malittarisassani allassimasut naapertorlugit pisarisat neqaat tamaat angerlaanneqartussaavoq, pilaffigisarlu qimatsinnagu salinneqartussaalluni.
Pinngortitaleriffimmiit uumasulerisut piniarfigisartagaq alakkaramikku piaqqat marluk pisarineqarsimasut takusimavaat. Siullermik qilalukkat 48-t pisarineqarsimasut oqaatigineqaraluarpoq, kisianni 32-iusut maanna nalunaarutigineqarpoq.
Ilisimatooq paasisassarsiortoq, Mads Peter Heide-Jørgensen, oqarpoq, pilattarfiit allat aamma taama isikkoqartut.
Piniarnermut naalakkersuisoqarfimmi pisortaq, Amalie Jessen, oqarpoq, Namminersornerullutik Oqartussat pisimasoq pillugu Illoqqortoormiunut paasissutissanik amerlanerusunik pissarsiniarlutik saaffiginnillutik. Inatsisinillu unioqqutitsisoqarsimanngitsoq politiit oqaatigigaluarpassuk, Naalakkersuisoqarfiup nammineq misissuisitsinissaa neriorsuutigalugu.
