Qilalukkat paasissutissanik nassiussuisassapput
Tassami qilalukkat qernertat paasissutissanik immamit itisuumeersunik pissarsiniartinnissaat pitsaalluinnartuuvoq, immanimi itisuuni ilaatigut immap kissassusaanik qanorlu taratsumik akoqartigineranik eqqortunik paasissutissiisinnaammata.Taama nittartartagaq pinngortitamik sammisaqartoq care2.com allaaserisaqarpoq.
Aamma Qimusseriarsuup Imartaa ilulissanik sarfaatitiffigineqartartoq aamma ukiuunerani anorersuartarnermigut peqqarniissinnaasarnermigut ilisimaneqartoq pissutigalugu, immami Nunatta Canadallu akornanni paasissutissanik eqqortunik pissarsiniarneq ajornakusoortinneqartarpoq.
Qilalukkat qernertat 2 kilometerit angullugit itissusilimmut aqqarsinnaasarput, qilalukkallu anersaarniarlutik immap qaanut pigaangata, paasissutissat radiukkut nassitsissummeersut qaammataasatigut ilisimatuunut ingerlateqqinneqartarput.
Kristin Laidrep Amerikami University of Washingtonimi, Polar Science Centerimeersup nittartakkamut care2.com-imut oqaatigaa, qilalukkat qernertat immami itisuumi nalunaarsugaasa ersersikkaat, imaq itisuumiittoq ilimagineqartaraluartumit gradimik ataatsimik kissarnerusoq.
Issittumi silap pissusaata allanngoriartorneranut ilisimatuussutsikkut misissuinerit pingaaruteqaleruttorfiini paasissutissat taamaattut pingaaruteqarluinnartut, Kristin Laidrep oqaatigaa.
Radiukkut nassitsissutit qaammatini arfinilinni arfineq marlunniluunniit nassitsisinnaasarput tamatumalu kingorna katattarlutik.
