Nunatta kitaani amerlavallaanik qilalukkanik qaqortanik qilalukkanillu qernertanik pisaqamasoqartarnera maluginiarneqarpoq. Tamannalu killilersimaarniarlugu inatsisiliortoqartariaqartoq JCNB-mit uparuarneqarpoq. JCNB-lu tassaavoq qilalukkat qernertat qaqortallu piujuaannartinneqarnissaat iluaqutiginiarneqarnerisalu aqunneqarnerat pillugu Canadamiut kalaallillu ataatsimiittartoqatigiivi.
Ataatsimiittartoqatigiit ernummatigaat, qilalukkat qaqortat ikiliartuinnarnerisa nalaanni qilalukkanik qaqortanik pisaqamanerup sualutsikkiartornissaa.
Taakku isumaqarput pisassarititaasut annerpaamik 100-sariaqartut.
Taamatuttaaq qilalukkanik qernertanik pisaqamaneq ernummatigineqarpoq ataatsimiititaliarlu isumaqarpoq qernertat pisarineqartartut 135-inik ikilineqartariaqartut.
Ataatsimiititaliaq JCNB ukiut 15-t matuma siorna pilersinneqarpoq, ullullu qulit matuma siorna Nunavumi Iqalunni ataatsimiipput. Iqalunni ataatsimiinnermi kalaalliniit Amalie Jessen Jens Danielsenilu peqataapput.