Qilalukkat ajoqusersimanersut nalunarallartoq

Cairn Energyp Baffinip kangerliumarngani immap naqqanut misissuinerani nipip maligaasai atorneqartut qilalukkanut qernertanut ajoqutaasinnaaneri qallunaat siunnersuisartut Namminersorlutik Oqartussanut siorna mianersoqqussutigaat.
Allattoq Knud Reimer
februaarip 14-at 2012 09:48

Aviisi Ingeniøren taama allaaserisaqarpoq. Nipip maligaasai sakkortuut atorlugit sajuppillatsitsisarnerit 3D-seismik-imik taagorneqartartut sutigut ulorianaateqarsinnaanersut ilisimasassarsiortut ilaat Namminersorlutik Oqartussanit suliakkerneqarsimasoq aviisip oqaloqatigisimavaa. Ilisimatuullu oqarnera naapertorlugu sumiiffiit mianersuuttariallit ilaatigut qaninngoorpallaarneqartarsimapput:

- Qilalukkat qernertat aasisarfinnaavaniit, piniartullu aasami qilalugarniartarfinnaarisaaniit, qilalukkat qimarratsinneqarnissaasa ulorianaateqarnerat mianersoqqussutigisimavarput. Qilalukkammi qernertat nipiliortunut malussarissuusut, allamukarfissaqanngitsullu, nalunngereeratsigu. Ilisimatusartoq David Martin Boertmann qallunaat avatangiisinut nukissiornermullu qitiusumik suliffeqarfianeersoq aviisimut Ingeniørenimut oqaluttuarpoq.

Naak taamatut nalunaaruteqartoqaraluartoq Cairn Energy misissuinissaminnut akuerineqarpoq, eqqaanili qilalugaqannginnissaa qulakkeerneqartassasoq piumasaqaatigineqarluni. Tassa qilalukkanik nasittoqaannartarsimavoq, naak misissuisut eqqaminni qilalugaqarnersoq, imaluunniit aqqaamaannarnersut, Cairnermiut qulakkeersinnaanngikkaluaraat. Ingeniørenimi allapput.

Nipip maligaasai sakkortuut sumiiffimmi qanoq siaruaattarnersut Namminersorlutik Oqartussat aamma piumasaqaatigisimagujaat, nipimmi atorneqartut sakkortungaarmata qilalukkat qoqerneqarsinaammata, qimarratsinneqarsinnaallutillu. Amerikamiulli nunap pissusaanik ilisimatuut misissuinerisa inerneri upernaaru aatsaat saqqummiukkumaaraat, Ingeniørenip allaaseraa.

Taamaammat Cairn Energy nipip maligaasai sakkortuut atorlugit naatsorsuutigineqartutut aasaru misissuileqqinnginnerini qallunaat avatangiisinut nukissiornermullu qitiusumik suliffeqarfiata misissuinermi inernerit aallaavigalugit innersuussisinnaanerat qulakkiivinneqarsinnaanngilaq.

- Misissuinerit inernerisa pissarsiarinissaat kingusikkaluarpoq, misissuinissamulli qinnuteqaatit uagutsinnit nalilersuiffigineqalersinnatik misissuinermi inernerit tigoreersimanissaat neriuutigaarput, Ilisimatusartoq David Martin Boertmann naggasiivoq.

Taamaammat nipip maligaasaanik sakkortuunik siorna aasakkut misissuisimanerit qilalukkanut qernertanut ajoqutaasimanersut suli oqaatigineqarsinnaanngikkallarpoq.