Qilalukkat aarrillu kisinneqarput

Qilalukkat aarrillu sinerissami qassit missaaniinnerat biologinit ulluni makkunanerpiaq misissugarineqaleruttorpoq.

Biologit Kangerlussuarmut angerlartarput ullorlu naallugu timmisartumiit qilalukkanik kisitsisarput.

- Timmisartorluta angalaarpugut, soorlu kujataani, qeqqani taavalu Qeqertarsuup Tunuani taavalu Uummannap eqqaani sineriak immikkoortiterlugu angalaffigisarparput, Arne Geisler oqarpoq.

- Qilalukkanik aavernillu kisitsinissinni aamma filmiliarisarpisigit?

- Suu, timmisartup ataani filmiliuuteqarpoq, taava ingerlanitsinni taanna filmi ingerlajuaannavippoq. Taava angerlamut apuukkaangatta filmi taanna missortarparput qilalukkanik aavernillu takusaqarsimanersoq misissorlugu, biologit ikiortaattut suleqataasoq Arne Geisler oqarpoq.

Qilalukkanik aavernillu kisitsisut inuit sisamaapput, ullorlu naallugu timmisartoreeraangamik Kangerlussuarmut uteqqittarput. avannamullu ingerlaqqinnissartik qanittukkut pissasoq aamma erseqqissaatigaat. Taakku piniartunik qanimut suleqateqarluartarput, piareersarnerminnilu KNAPK peqataatilluartarlugu, tamatumalu saniatigut sinerissami piniartuniit qilalukkanik qassinik naammattoorsisoqarsimanersoq, sikullu qanoq inneranik, ataavartumik nalunaarusiuunneqartarput.

Biologilli maanna angalasut maannamut oqaatigisinnaanngikkallarpaat ukiunut siuliinut sanilliullugu qilalukkat aarrillu amerlisimanersut ikilisimanersulluunniit.

Oqaatigineqareersutuut misissuineq filmiliuut timmisartup ataaniitillugu ammut filmiliorneq ingerlanneqartaraluartoq, taamaattoq eqqarsarluarnissaq alaatsinaalluarnissarlu pingaartuusoq erseqqissaatigineqarpoq.

- Misissuineq imaappoq ilaanni artornalaartarluni, tassami inuit sisamaavugut timmisartup iluani igalaat immikkut sanaat ammut isiginnaarfigalugit kisitsiniartarluta, qasunalaartarpoq. Aamma angerlaraangatta båndimut immersukkagut iluamik aaqqissortarlugit filmillu aamma, biologit ikiortaattut suleqataasoq Arne Geisler oqarpoq.

Qilalukkanik aavernillu kisitsiartortut marsip 20-ni aallartipput, apriilip 20-ata tungaanut kisitsinertik ingerlatissallugu.