Qilalukkap qernertap tuugaavata iluaqutaanera paasineqarpoq

Qilalukkat qernertat tuugaavisa sumut iluaqutaaneri qangaaniilli nassuiarneqarniartuartarpoq. Ukiuni akullerni akimasuunut tunissutaagajuppoq – enhjørning-ip, tassa hiisti qaamigut nassullup – nassuatut.

Ukiut 1600-ssaanni tuluit kunngiat arnaq Elizabeth Siulleq nassummik qaqutigoortumik tunissutisivoq, taamani tuluit aningaasaasa 16.000 pundit, ujaqqanik pallittaalisaliap sananerata akeqataanik. Qilalukkat qernertat tuugaavisa sumut atuutaaneri assortuussutaasarsimaqaaq, ilaasa sikumik putoorititut, aalisakkanut kapuutitut, umiarsuarnik putusissutitut, nipinik ingerlatitseqqissutitut, timip kissaanik aniatitsivittut; ilarpassuilu ilanngullugit.

Maannali U.S.A-mi immami miluumasunik ilisimasallit, qilalukkat tuugaavisa sulluisa qinnguartarneri milliuuninik qulinik alliserujussuarlugit paasilersimavaat, tuugaap sulluata qeqqaniit sianiutit aallaavii, silammut tuugaap qaavanut atanillit takusinnaalerlugit. Pinngortitami sananeqaat assiitsoq. Uppernarsivaallu tupinnaannartumik maluginiutaasoq misikkarilluinnartoq.

Immap kissarnerata allanngorarneri, naqitsineq, immap sunik tappiorannartunik akoqarnera, qularnanngitsumillu paasissutissanik assigiinngitsorpassuarnik maluginiutigigaat paasineqarpoq.

”Qilalukkat qernertat tuugaavisa sunut iluaqutaanerisa paasineri nalissaqanngitsuuvoq. Paasisat nutaat. Uppernarsaataaginnarpoq arferit aarluarsuillu pillugit qanoq ilisimasakitsigisugut” Dr. James G. Mead aviisersuarmit New York Times-imit ullaaq apersorneqarluni oqarpoq.