Siorna pisassiissutigineqartut assigalugit, qilalukkat qaqortat qernertallu immikkut tamarmik 310-t pisarineqarsinnaapput.
Savissivimmi Upernavimmilu siorna pisassiissutigineqartunit amerlanerusunik pisaqartoqarsimavoq. Taamaattumik Savissivimmi Upernavimmilu siorna pisassiissutinik sippuilluni pisarineqarsimasut 15-it ukioq manna pisassiissutaasunit ilanngaatigineqarput.
Sumiiffinnili taakkunani piniartut pisarisimasaminnik nalunaarutaat tiguneqareerpata, pisassiissutissat aaqqiivigineqaqqissapput. Savissivimmi qilalukkat 13-it Upernavimmilu 53-it maannamuugallartoq pisassiissutigineqarput.
Aaqqissuteqarnissaq sumiiffinni taakkunani pisassat amerlinerinik ikilerinilluunniit kinguneqarsinnaasoq, Piniarnermut, Aalisarnermut Nunalerinermullu Naalakkersuisoqarfik ilisimatitsivoq.
Pisassiissuteqarnermi Qaanaaq qilalugartassinneqarnersaavoq. Qilalugartassiissutigineqarpummi 85-it. Taamaattorli Upernavik qilalukkanik qernertanik 85-inik qilalugartassinneqarnersaavoq.
Qilalugartassiissutit tunniunneqarput biologit siunnersuutaat najoqqutaralugit.
qilalukkat amerliartornissaat – qilalugartassiissutit tunngavigalugit – 70 procentimik ilimanaateqartoq, biologit nalailiipput.
Tamanna Piniarnermut, Aalisarnermut Nunalerinermullu Naalakkersuisoqarfiup tusagassiuutinut nalunaarutaani takuneqarsinnaavoq.