Qilalukkanik annissueqqusiunnaarput
Qilalukkat qernertat neqaanik mattaanik tuugaavinillu CITES-i aqqutigalugu nunatsinniit avammut annissisinnaaneq inerteqqutinngortinneqarallarpoq. Naalakkersuisut ippassaq ataatsimiinnerminni taamatut aalajangerput, tamannalu Naalakkersuisut tamarmiullutik aalajangerpaat.
Qilalukkap qernertap mattaa, neqia aammalu qilalukkap tuugaavanik pinnersaasiat eqqumiitsuliallu, CITES-imit akuersissut atorlugu nunatsinniit annissuisoqarsinnaajunnaarallarpoq.
Pinngortitamut Avatangiisinullu Naalakkersuisoq, Asii Chemnitz Narup oqarpoq taamatut aalajangerneq allatut ajornartumik pisariaqarsimasoq. Qilalukkat neqaat mattaat tuugaavilu CITES-ip allattorsimaffiani immikkoortoq 2-miit 1-mut pisinneqarnissaat pinngitsoortinniarneqarsimavoq. Taamatullu pisoqassagaluarpat, qilalukkat piniaqqusaajunnaavissinnaapput.
Washington-imi isumaqatigiissutaasimasoq naapertorlugu Pinngortitaleriffik tassaavoq Kalaallit Nunaanni ilisimatusarnikkut Siunnersuisoqatigiiffiatut sulialik.
NAMMCO-p ataani aammalu nunatta Canadallu akornanni suleqatigiissitaani, ukioq kingulleq oktobarip qaammataani ataatsimiittoqarnerani, Pinngortitaleriffimmit nalunaarutigineqarsimavoq, piujuaannartitsilluni qilalukkanik piniartarneq Nunatsinni atuutinngitsoq. Pinngortitaleriffik isumaqarpoq, pisassiissutissatut Pinngortitaleriffimmit innersuussutigineqarsimasut 135-iusut qaangerneqarsimammata, Kalaallit Nunaanni qilalukkanik qernertanik nungusaataanngitsumik piniartoqarunnaarsimasoq.
Ukioq kingulleq CITES-i aqqutigalugu qilalukkaneersunik nunatsinniit annissuinerit 1961-iusimapput.
Qilalukkat qernertat nungutaanissaanik ulorianartorsiorunnaartutut biologinit aatsaat nalilernerqaqqereerpata, qilalukkat qernertat nunatsinniit anniseqqusaajunnaarnerat kingumut nalilerneqaqqisasoq Pinngortitamut Avatangiisinullu Naalakkersuisoq Asii Chemnitz Narup nalunaarpoq.