Qilalugartassiinerit nunatsinnut isiginerlutitsisinnaapput
Qilalukkanik qernertanik naalakkersuisut pisasseeqqinnerat nunatta avammut isigineqarneranut ajoqusiisinnaavoq, minnerunngitsumik nunatsinni qilalukkat pillugit suliaqartunut.
Taama oqarpoq, piniarnermi aalisarnermilu pisortaqarfiup pisortaa Amalie Jessen, taanna nassuiaavoq tamanna ingammik maluginiarneqassasoq nunat tamalaat qilalukkat qaqortat qernertallu pillugit ataatsimiititaliaasa akornanni, tamakkumi nalilersorlugillu oqallisigisarpaat qilalukkanik pisassiinerit qaffasinnersut qaffasinnginnersulluunniit.
Taamatuttaaq IWC-imiit siorasaarutigineqarpoq, nunat namminneerlutik pisassiissutissanik aqutsisinnaanngippata namminneq qulaaninngaanniit aqutsilertariaqassallutik.
Taakkulu taama siorasaarinerat nunatsinnut sakkortuumik tussinnaavoq, tamannalu aamma Canadamut sunniuteqarsinnaavoq, tassami qilalukkanik pisassiinerni nunatta Canada avitseqatigisarmassuk.
CITES Animal Committee-miit upernaaq aalajangerneqarpoq, uumasut niiverutigineqarnermikkut nalorninartorsiortinneqarannut atatillugu, nunatsinni Canadamilu qilalukkat piniagaanerat misissuiffigineqaqqissaassasoq.
Tamannalu suli inaarneqanngimmat, nunatsinni qilalugartasseeqqinnerit pissutsinut tamakkunnga oqinnerulersitsinavianngilaq.