Qilalugartasseeqqinnissaq naatsorsuutigineqarsinnaanngilaq

Uummannami piniartut kommunelu qilalugartassiissutit ilaneqarnissaannik, ilaneqarsinnaassanngippatalu, piaartumik ikiorsiinikkut aaqqissuteqartoqarnissaanik pisortaqarfimmut naalakkersuisunullu piumasaqarput, ukioq manna qilalugartassat tamakkerneqarmata. Uummannap sulluani maanna qilalgarpassuaqarpoq suneqarsinnaanngitsunik. Taamaakkaluartorli qilalugartassat ilaneqarsinnaanissaat naatsorsuutigineqarsinnaassanngitsoq, Aalisarnermut Piniarnermullu Pisortaqarfiup pisortaa Amalie Jessen oqarpoq.

- Ulluni makkunaneqqeqqissaaq naalakkersuisoqatigiinngortussat suli isumaqatigiinniarput, tassungalu killissimatillutik iliuuseqarsinnanngillat, isumaqatigiinniarnerit pissutigalugit.

Uummannami qilalugartassat amerleqqinneqarsinnaannginnissaat naatsorsuutigisariaqartoq Pisortaqarfiup pisortaa oqarpoq.

- Ullumikkuinnaq taanna ajornartorsiutiginngilaat, qaammatip siuliani immaqa aamma tulliani ajornartorsiutigissavaat. Ajornartorsiut sooruna suleqataaffigerusussavarput, kisianni pisassiissutit amerlineratigut iliuuseqarnissaq naammassanersoq uanga nalilersinnaanngilara.

Amalie Jessen-ip erseqqissaatigaa biologit inassuteqaataasa qanoq inissisimanerat eqqarsaatigisariaqartoq.

- Neqissaqarniarneq eqqarsaatigalugu pisassiissutit tamakkiisumik inississimavagut, ilaseqqinnissamullu Pisortaqarfiminngaanniit kajumissaaruteqanngilagut.

Qilalugartassat amerleqqinneqarsinnaanerinut Naalakkersuisut kisimik aalajangiisinnaapput, apeqqutigaarput allatigut ikiorsiinissamut Pisortaqarfik piareersimanersoq. Amalie Jessen akivoq:

- Imatut saniatigut immikkut ittumik iliuuseqarnissamut tigusaqarnikuunngilagut, Uummannap kommuneanit allagarsiarput eqqaassanngikkaanni. Taamaattorli puisit amiinut tapiissutit eqqaasinnaavakka, kisianni aamma ukiup imaalinerani nungulersut nalunngilagut, soorunami suli isumalluutaalaarsinnaapput. Kisianni allatigut Naalakkersuisoqarfiup uuma iluani sinaakkutissagut periarfisssiinngillat, Aningaasanut Inatsisip iluani iliuuseqartoqassappat Pisortaqarfitta avataaniit aatsaat aallertoqarluni iliuuseqartoqarsinnaassaaq.

Amalie Jessen-ip erseqqisaatigaa qilalukkanik pisasseeqqittoqassagaluarpat tamatuma piaartumik pinissaa naatsorsuutigineqarsinnaassanngitsoq naalakkersuisuugallartut aalajangeqqaartussaammata. Tamanna pillugu naalakkersuisuungallartut siulittaasuat Hans Enoksen oqaaseqartinniaraluaratsigu iluatsinngitsoorparput.