Qilalugartasseeqqinneq WWF-ip qisuariarfigaa
Pinngortitaq pillugu nunarsuaq tamakkerlugu suliniaqatigiiffik WWF isumaqarpoq, Kalaallit Nunaanni qilalukkanik qaqortanik qernertanillu pisassiissutissanik Naalakkersuisut ilaseqqinnerat piujuaannartitsinissamut assortuisoq. WWF-imi issittoq pillugu suleqataasoq, Ane Mette Bjerg ima oqarpoq.
- Tamanna isumatusaarnerunngilaq, ilisimaneqareerpormi qilalukkat ukiuni kingullerni arlaqalersuni ikiliartuinnavissimasut, Ane Mette Bjerg, nunarsuaq tamakkerlugu pinngortitaq pillugu suliniaqatigiiffimmi WWF-misulisoq oqarpoq, nangillunilu: - Qilalugaqassutsimik ilisimasallit oqareerput qilalukkat ikiliartortut, pisassiissutissatullu siunnersuutigineqartut sinnerujussuarlugit pisassiisoqareerpoq, taamaammat qilalugartassanik 50-nik ilasisoqaqqinnera piujuaannartitsinissamik siunertaqartumik piniartuunermik oqalunneq imminut assorpoq.
Avannaani piniartut sapaatit akunnerini kingullerni arlaqalersuni oqalupput qilalugarpassuaqartoq, kisianni qilalukkat katersuukkaangata amerlasoorujussuusutut isikkoqartarput, imaanngilarli Kalaallit Nunaat tamakkerlugu qilalugarpassuaqartoq, Ane Mette Bjerg oqarpoq nangillunilu: - Aamma tupinnassaaq ullormiit ullormut qilalukkat amerlisimassappata, kisitsisarnerimmi ukiuni arlalissuarni ingerlanneqartarput, qilalukkallu ikiliartornerinik kisitsisit tikkussipput.
Qilalukkat qaqortat eqqarsaatigalugit pisassat illoqarfinni allani pisarineqarsimanngitsut kommuninut allanut pisassiissutissatut nuutinneqarnerat qilalugaqatigiiaanut aalajangersimasunut nungusaataasinnaapput, tamannalu ajuusaarnarpoq, Ane Mette Bjerg oqarpoq nangillunilu:
- Qilalugaqassutsimik ilisimasallit nalunnginneruaat qilalukkat qanoq amerlatiginersut, piniartut piniarneq kisiat ilisimavaat, Ane Mette Bjerg oqarpoq nangillunilu. Nunarsuup sinnerani arfeqassutsimik kisitsisarnerit atorsinnaasimappata, aamma Kalaallit Nunaanni qilalukkanik qaqortanik qernertanillu kisitsisarnerit ajorsimanavianngillat, Ane Mette Bjerg naggasiivoq.
