Qaqortanik qernertanillu qilalugaqassutsimik biologit kisitsisimanerat piniartut ilisimasaanut naleqqussartariaqartut, Siumup Naalakkersuinikkut oqaaseqartartua Lars-Emil Johansen oqarpoq.
- Ulluni amerlasuuni piniartut allallumi angalasut tamarmik takusaaminnik nalunaaruteqartarput, qilalugarpassuaqartoq, taamaattumik Naalakkersuisunut innersuussuteqarpunga piniartut biologillu nalilersuinerat ataatsimoortillugit nalileeqqittoqartariaqartoq, Lars-Emil Johansen oqarpoq nangillunilu:
- Pisarineqartsarsimasut agguaqatigiisillugit, pisassanik affaannanngortitsineq iliuusaavoq sakkortooq, pingaartumik nalornisoqarpat. Biologit tamakkiisumik kisitsisit pigineraat nalornissutigineqarpoq, taamaattumik, piniartut biologillu ilisimasaat ataatsimut katillugit naliliiniartoqartariaqarpoq.
Taama oqarpoq Siumup naalakkersuinikkut oqaaseqartartuat, Lars-Emil Johansen.
Pinngortitaleriffimmi pisortaq, Klaus Nygaard oqarpoq, Lars-Emil johansen-ip siunnersuutaa paasisinnaanagu.
- Qilalugartassiissutissatut biologit innersuussutaat sinnerujussuarlugu Namminersornerullutik oqartussat piniartunut qilalugartassiinikuuvoq, taamaammat qilalugartassanik amerleeqqinnissaq innersuussutigerusunngilarput, Pinngortitaleriffiup pisortaa Klaus Nygaard raatiuaviisimut oqarpoq.
- Oqaatigerusuppara, biologinut ataqqinninneq tunuarterfiginngilluinnarakku. Biologit naliliisarput eqqorsorisaminnik imaanngilarli uniffiit tamaasa ilanngullugit biologit innersuussutaat malinneqassasoq. Nalornisimappata, nalorninerat tamaat ilanngullugu naliliisoqartariaqarpoq.
Taama oqarpoq Siumup naalakkersuinikkut oqaaseqartartuat, Lars-Emil Johansen.