Qilalugarniat imminnut kiisa eqqortalerput
Qeqertarsuarmi ullumi qilalugarniartoqartillugu saniatigooralugu pinialuttartut ilaat aqerlumit tammiffigitilluni niaqqumigut aallartoorfigitingajappoq nasaa katatsillugu, taannalu oqarpoq uloriarsimanngikkaluaruni niaqqumigut eqqortissimassagaluarluni. Taanna annilaartinneqarujussuarpoq. Qaammatilli kingulliup naanerani ajornerusumik pisoqarpoq, tassa angut alla qilaluagarniartoqartillugu aallaaneqarmat – aallaaneqarneranilu kaasarfianiittoq nalaatsornikkut imassaq eqqorneqarpoq, imassarlu eqqorneqartoq aallarmat nissumigut ikilerneqarpoq – taannalu Dronning Ingridip napparsimavissuanut Nuummiittumut suliaritikkiartortariaqarsimavoq. Angutip taassuma umiatsimi ilaaqataa alla aqorlumit aamma attupillaneqarpoq.
Taamaalilluni Qeqertarsuarmi qilalugarniarneq massakkumut inuit pingasut inuunerannik ulorianartorsiortitsinermik kinguneqarpoq.
Qeqertarsuarmi politeeqarfiup ittua, Morten Mandrup oqarpoq, pisoq siulleq maanna politiinit misissorneqartoq, ullumilu pisoq pillugu aamma politiinut saaffiginnittoqarsimasoq oqaatigaa. Taassuma oqaatigaa pisut kingulliit qujanartumik nalaatsornerinnarmik inuit inuunerannik naleqarsimanngitsut.
Qeqertarsuarmi Aalisartut piniartullu peqatigiiffianni siulittaasup tullia, Anders Petersen oqarpoq, Qeqertarsuarmi qilalugarniarneq ulorianartorujussuarmik ingerlanneqartoq, umiatsiallu sumiinnerat apeqqutaatinnagu qilalukkanik seqqortarneq inuit inuunerannik assut ulorianartorsiortitsinermik kinguneqartartoq.
Qeqertarsuarmi politiinniit oqaatigineqarpoq sakkut atornerisa kingunerisaanik inuunermik navianartorsiortitsineq qanorluunniit qilalugarniarneq pineqaraluarpat, inummut pineqaatissiinermik kinguneqartinneqarsinnaasoq.