Qilalugarniartarneq akuersaarneqarnerulerpoq
Uumasunik nujuartanik naasunillu nungutaaqqajaasunik niuerneq pillugu Cites-ip Bangkok-imi ataatsimiinnerani nunatsinni qilalugarniartarneq akuersaarneqarnerulerpoq.
Siusinnerusukkut Holland-ip piumasaqaatigigaluarpaa nunatsinni qilalugarniartarneq pillugu nunarput naalagaaffeqatigiillu iluani Danmark qilalukkanik piniartarneq pillugu arlaatigut pillarneqartariaqartut qilalukkanik piniapiluttoqarnerarlugu.
Tamannalu tassa Cites-mi itigartinneqarpoq.
Kisianni suliaq siunissami qaqinneqaqqeriaanaasoq ilimagilluinnarlugu ataatsimiinermi danskit aallartitaasa ilaat Maj Friis Munk aviisimut Politiken-imut oqarpoq.
Nunarput qilalugarniartarneq pillugu killilersuiffigineqalissasoq siusinnerusukkut ilimagineqaleraluarpoq, Cites-illi massakkut isummerneratigut nunatsinni qilalugartassiissutit amerlassusat 300-juusut, arferit taakua nungukkiartulernerannik kinguneqarnavianngitsoq ilimagineqalerpoq.
Uumasunillu illersuiniaqatigiit siuttoralugit taamatut aaliangerneq naamagittaalliutigineqarpoq, ukiuni aggersuni suliaq qaqinneqaqqisssasoq ilimagineqarluni.
Ukioq 2003 tikillugu nunatsinni qilalugartassiissutit 700-nik amerlassuseqarput, ilisimatuut 135-nik pisaqartoqartarnissa innersuussutigigaluaraat, massakkullu pisassat ukiumut 300-nik amerlassuseqarput.
