Qilalugarniarnerput misissornialerpaat
Uumasunik nujuartanik naasunillu nungutaaqqajaasunik niuerneq pillugu aalajangersakkap, Cites-ip, ataatsimiittartoqatigiivisa ippassaq Genevemi ataatsimiinnerminni aalajangiuppaat nunatsinni qilalugarniartarneq sukumiisumik misissuiffigineqassasoq, naak misissuinissamik siunnersuut oqaluuserisassat akornanniinngikkaluartoq.
Aalisarnermut piniarnermullu pisortaqarfimmi pisortaq Amalie Jessen oqarpoq qilalukkanik qernertanik piniarnerup sukumiisumik misissuiffigineqarnissaanik Citesip ataatsimiittartoqatigiivisa aalajangernerat ajuusaarnartuusoq, taamatut aalajangerneq ataatsimiinnermini aalajangiiffigisassatut siunnersuuteqarnermik tunngaveqanngimmat.
Aalajangernerup tunualiaqutigaa Cites-ip ataatsimiittartoqatigiivini Comitteep Europaminngaaneersut ilaasortaata qilalukkat sukumiisumik misissuiffigineqarnissaanik siunnersuutaa. Misissuititsinissami paaserusunneqarpoq nunatsinni qilalugarniarneq ilumut nungutsaaliuinermik tunngaveqarnersoq.
Amalie Jessen oqarpoq taamatut siunnersuuteqartup paasissutissat uumasunik illersuiniaqatigiiffimmit WWF-imit pissarsiani kiisalu uumasunik illersuiniaqatigiit allat Whale and Dolfin Conservation Society-meersut paasissutissiineri aallaavigigai.
Citesimi ipassaq isumaqatigiissutaavoq Namminersornerullutik Oqartussat ullut 30-t qaangiutsinnagit allaffigineqassasoq qilalugarniarneq pillugu apeqqut sukumiisumik akeqqullugu. Tassunga ilanngullugu paaserusunneqarpoq qilalukkap kigutai atorlugit sanalukkanik avammut nioqquteqartoqartarnersoq. Taakkununngalu ilanngullugu aamma paasiniarneqartussaavoq qilalukkanik piniakkanillu allanik killilersuinermi pisassiisarnermilu maleruagassat qanorpiaq ittuunersut.
Amalie Jessen oqarpoq taamatut siunnersuuteqarnermi tunngavilersuutit eqqoqqissaartuunngitsut saqqummiunneqartut. Soorlu oqaatigineqarsimavoq piniartut qilalugarniarsinnaasut 11.000-iusut, pissusiviusulli allarluinnaallutik, tassa pisassinneqartartut kisimik qilalugarniarsinnaatitaammata.
