Pinngortitaleriffik Naalakkersuisunit neqeroorfigineqarpoq Aalisarnermut Piniarnermullu Naalakkersuisoq Finn Karlsen avannaanut qilalukkanik takusaalerpat peqataaqqullugu. Tamanna pivoq avannaani kommuneqarfinnut qilalugarniarfiusartunut pisasseeqqinnerup kingorna. Naalakkersuisut taama neqerooruteqarnerat Pinngortitaleriffimmit tigulluarneqartoq Pinngortitaleriffiup avammut paasissutissiisartua Emma Kristensen oqarpoq.
- Soorunami nuannaarutigaarput taamatut qaaqquneqarnerput avannamukaqataassallutalu.
Pinngortitaleriuffiup avannaanukaqataanissaa kisitsinermut atorneqarsinnaanngitsoq Emma Kristensen erseqqissaavoq.
- Angalanissarput ilisimatuussutsikkut suliaqarnermut atatillugu atorsinnaanngilarput, kisitsisarnerit pilersaarusioqqaarlugit aatsaat ingerlanneqartarmata, taakku taakkununngalu atassuteqartut suut tamarmik aatsaat piareeraangata ilisimatuussutsikkut sulinermut atorneqartarmata.
Pinngortitaleriffiup avannaanukaqataanissaa allatut atorneqassasoq Emma kristensen erseqqissaavoq:
- Taavunnassaagut taavunnarnissarput piumasaaqatigineqarmat, aammalu piniartut innutaasullu taama oqariartuuteqarnerat ataqqillugu, ilumoorullugulu tigugatsigu taavunnarniarpugut.
Avannaani piniartut innuttaasullumi qanimut naapeqatigineqarnissaat Pinngortitaleriffimmit pingaaruteqartinneqarpoq.
- Soorunami taamatut kiinerfigeqatigiilluni naapeqatigiinnerni tamatigut pissarsinartarpoq, taamaattumillu neriuutigivarput biologit siunnersuisarnerannut tunngatillugu tunuliaqutaasut immaqa paatsoornarsinnaasartut aammaarluta uteqqillugit nassuiaateqarfigeqqissinnaassallugit. Tamaalilluta neriuutigaarput siunnersuisarnerit tunuliaqutarisartagaannik paasinninneq annertulerulersissinnaassallugu.
Pinngortitaleriffik KNAPK-lu piniartut aalisartullu peqatigalugit isumaqatigissuteqarnikuuvoq attaveqatigiittarnerup annertusarneqarnissaanik imaqartumik.
Emma Kristensen oqarpoq qilalukkanik kisitsinissat annertunerusunngortinneqarnissaat pilersaarutaasoq,
Uummannamilu aappaagu qilalugaqarnerata nalaani misissuinissaq pissasoq ukiakkut novembarimi.