Qilalugaq naalliuttoq piniartut toqukkusukkaluarlugu utaqqisitaapput

Allattoq Najaaraq Egede
marsip 09-at 2007 17:26

Niaqornani piniartut, ullaaq manna piniariarlutik aallarnerminni naammattoorpaat qilalugaq naallioqaluni ikeqaqalunilu nikeriaqqineq ajulersimasoq. Qilaluartassat Uummannap kommuneani nungoreerput, taamaammallu qilalukkamik toqutsisinnaaneq inerteqqutaalluni. Uumasoq naalliuttoq toquttariaqartorlu isigalugu qanorlu ilioriarsinnaanagu piniartup Niaqornaneersup Karl Kristian Kruse-p, ima oqaluttuaraa:

-Ullaarli qilalugaq nammineq nalunngilluagarput qapasak isitsinnik takuneqarsinnaalluartoq susassaqartunut ingerlatittaraluaratsigu, massakkumut qanoq iliuuseqarfigineqanngimmat nammineerluta isitsinnik nallinnarpallaaqimmat toqunniaraluarlugu suli akuersissummik takuneqarata.

-Sarpii kittoralersut qilalugartaata manna qaatungaa neqeqanngitsoq. Ima sanngiitsigivoq umitsiamut talisillugu massakkut ikeqanngitsoq uninngaqatigaarput, tusaasinnavarsi anersaartaartoq, una kalitani allunaasaq aappaluttoq takkajaaq annertuumik sanngiillissutigisimagamiuk, tassa sarpii kittoraleramik illuttut.

Piniarnermut Nakkutilliisumut aamma Niaqornani kommunefogedimut ullaarli suliaqartikkarluarpaat.

- Upperiumaneqanngitsutut inissisimatitaanerput assorsuaq akueriuminaappoq. Una piniagaq naalliuttoq nallinnartorlu toqukkaluarutsigu, kisianni unioqqutitsisutut toqutsisutut nalilerneqartussaagatta akuerineqarnissarput assut kissaatigigaluarparput.

(Anersaartorparluttoq eqqaani tusarsaavoq)

-Tassa taama qanitsigivoq. Sivisoorujussuarmik naalliussimagami qaliarusia neqaarussimavoq, qilalukkat qaatungaani neqaa. Karl Kristian Kruse oqarpoq.

Piniarnermut Pisortaqarfimmi sulisut pisoq tusarsimavaat, qilalukkallu toquginnarneqarnissaanut akuersisimallutik. Taama oqarpoq Piniarnermut Pisortaqarfimmeersoq, Ole Heinrich-ip Pisortaqarfimmeersup suliat taamaattut arriitsumik ingerlasinnaasarneri patsiseqarnerarpai, uumasut ajoqusersimasut toqunneqarnissaat anguneqassappat uppernarsaatissanik saqqummiussisoqaqqaartassammat. Qilalugarli Uummannap eqqaani Niaqornani naammattoorneqarsimasoq, toqunneqareersimavoq. Neqaa mattaalu suliffeqarfinnut paaqqinnittarfinnullu agguaanneqassasoq Pisortaqarfiup erseqqissarpaa.