Qilaluartassat amerlinissaat qinnutigineqarpoq
Uummannami inuussutissarsiutigalugu piniartut 350-it missaanniittut ukioq manna qilalugartassatik katillugit 76-iusut tamakkerpaat. Uummannallu sullorsuanut qilalugarpassuit ulluni makkunani pulasimarpalupput suneqarsinnaanatilli.
Uummannap borgmesteria Jens Lars Fleischer piniarnermut pisortaqarfimmut ippassaani allagaqarsimavoq, piniartut isertitassaaruttut eqqarsaatigalugit qilalugartassat amerlisinneqarnissaannik qinnuteqarluni. Jens Lars Fleischer oqarpoq, piaarluinnartumik massakkut qanoq iliuuseqartoqartariaqartoq:
- Kommunalbestyrelsi sinnerlugu Naalakkersuisunut saaffiginnissuteqarpunga qilaluartassiissutit amerlineqarnissaannik. Kisianni maannamut akissummik suli tigusaqanngilagut.
Jens Lars Fleischer oqarpoq Uummannami piniartut aalisartullu inuuniarnikkut massakkut assut ajornartorsiortut.
- Tassa qilalukkernerani qalerallit itinninneratigut aalisarniarneq ajornartorujorujussuanngortarpoq, inuuniarnikkut annertuumik oqimaattorsiortitsilersarluni.
- Massakkut qilaluarniarnissamut periarfissaq pitsaangaluartoq killilersuinerujussup kingunerisaanik piniaqqusaasoqanngilaq.
Uummannami piniartut piniarsinnaannginnerat kommunemut annertuumik aningaasartuuteqarnermik kinguneqartussanngortoq borgmesteri oqarpoq.
Ikiorsiisarnikkullu aningaasartuutissarpassuit kommunep nammineerluni nammassinnaanngikkai borgmesteri oqarpoq.
- Aningaasaqarnerput oqimaareerpoq massakkut, annertuumillu iluarsiiniutissatsinnut nukissaqanngilagut.
Pisortaqarfimmut saaffiginnissut tunngaviaglugu iliuuseqartoqanngippat allatigut periarfissarsiuunneqarnissartik pisariaqassasoq Jens Lars Fleischer oqarpoq.
- Naalakkersuisuungallartut partiillu tamarmik isummerfiginiartariaqarpaat, inuuniarnikkut ajornartorsiorneq periarfissaqanngitsutut isigalugu arlaatigut iliuuseqartoqartariaqarpoq. Killilersuineq sakkortoorujussuaq atorparput qilalukkat ingasattajaartumik killilersorneqarput qularnanngitsumik, taamaattumik periarfissatsinnik arlaannik tunisariaqarpaatigut. Inunnik isumaginninnikkut ikiorsiiginnarnissamut naleqqutinngilaq aamma uagut kisimilluta iluarsiiniarnissatsinnut nukissaqanngilagut, Jens Lars Fleischer erseqqissaavoq.
Uummannami ukioq manna qilalugartassiissutaasut 30-t missaannik sipporneqarput. Siorna qilalugartassiissutit tamakkerneqanngitsoorput, qilalukkat 20-t pisarineqanngitsoorlutik, siorna silap unerisimannginnerujussua pissutigalugu. Piniarnermut pisortaqarfimmit ilisimatitsissutigineqarpoq, pisassiissutit sipporneqarsimatillugit, sippiuinerit tullianik pisassiissutissanit ilanngaatigineqartartut. Aamma erseqqissaatigineqarpoq, imaaliallaannarluni Uummannamukartitsinissaq pisinnaanngitsoq angalanissat suliassallu piffissangaatsiaq atorlugu pilersaarusioqqaarneqartarmata. Tulliani qilalugartassiisoqassaaq aappaagu aasakkut.
