Qilakitsormiut Uummannap katersugaasiviani nutaamik saqqummersinneqarput
Qilakitsormiut inuit panernikut arfineq pingasut Uummannap eqqaani ukiut 54-it matuma siorna nassaarineqarput.
Qilakitsormiut pillugit ilisimatusartup ph.d.-nngorniartullu Sara Næss Elleskovip Uummannami katersugaasivik suleqatigalugu qilakitsormiut pillugit paasissutissat aasaq manna nutarterpai.
- Kingulliit 80-ikkunneersuupput, taamaammat nutarterneqarnissaa pisariaqarsoraarput. Tamatuma saniatigut saqqummersitap tikeraanit katersugaasivimmut pulaartunit pitsaanerusumik ilisimasaqarnerulernissaannut katersugaasiviup pisortaata Carinap ersersikkusuppaa.
Qilakitsormiut atisaat sunalu toqussutigisimasinnaaneraat nutarterneqartunut ilaapput.
Sara Næss Elleskovip ph.d.-liamini qilakitsormiut najugaqarfiallu qanoq ilisimatuunit piffissap ingerlanerani
misissuiffigineqartarsimanersut pillugu sammisaqarpoq.
Soqutigineqarluartoq
Saqqummiunneqartullu Uummannami innuttaasunit soqutigineqarluarput.
– Ilai tunniusimalluinnarput, assullu soqutiginnillutik, ilisimasatillu pillugit oqaluttuarusullutik. Allalli ilisimasaqarpallaanngillat. Kinguaariit akornanni tamanna assigiinngiiaarpoq, Sara Næss Elleskov oqarpoq.
Uummannami katersugaasivimmi pisortap Carina Jeremiassenip saqqummersitaq nutaaq innuttaasuniit takornarianiillu soqutigineqartoq oqaatigaa.
Namminerlu paasissutissat nutarterneqarneri pingaarutilittut nassuiaatigaa.
-Pingaaruteqartorujuuvoq, una ilisimatusartoq aamma Qilakitsoq pillugu ilisimasassarsiorluni atuarami taava iluatsillugu suleqatiginikuuarput taavalu nutarsarlugu taanna udstilling nutaaq.
Nukannguaq Mathiesen ilinniartutut ikiortitut ilisimatusartoq Sara Næss Elleskov peqatigalugu Uummannap Katersugaasiviani saqqummersitsinermi ikiuutaavoq, peqataasimaninilu pissarsiaqaatigisimavaa.
-Oqaluttuarisaanitsinni ilisimasagut Ilisimatuussutikkut annikittuararsuusut tunngavilersukkamik taamaalilluta paasisaqarnerusarpugut ilisimatuussutsikkut tunngavilersukkanik ilisimasaqarnitsinnut tunngatillugu, kisianni uagut inuit paasinnittaaserput malillugu oqaluttuatigut ingerlatseqqinneqartartut nuannertorujuusarput oqaluttuarisaaneq eqqarsaatigalugu taamaattumik maaniinnera pissarsiaqaatigivara qanimut innuttaasuninngaanniit.
Uummannarmiu Hans Grønvold Qilakitsormiunik inunnik panernikunik 1972-mi nassaartunut ilaavoq, qilakitsormiunillu ilisimatusarnerup suli soqutigineqarnera nuannaarutigaa.
-Misissorneqartarnerini taanna neriuutigisatsinniit annertunerujussuarmik massakkumut taakku kinguneqarneri taanna nuannaarutigisarparput, Hans Grønvold oqarpoq nangillunilu:
- Ilisimatusartup saqqummiutai taakku malissagaanni takusinnaavara annertunerusumik ilisimatusarfigineqarlutillu misissuiffigineqarneri suli ingerlasut, taamaattumik suli aamma siunissami annertusiartoqqinnissaat taanna ilimanaatilerujussuuvoq.
