Qilaatersorneq UNESCO-mut 2021-mi innersuunneqarpoq
Tamanna aappaagu pissaaq, Mette Bock ullumi tusagassiuutinut nalunaarummi taama oqarpoq.
Danmark perngarluni UNESCO-p nunarsuarmi eriagisassanut tigussaanngitsunut kingornutatut allattuiffianut innersuussuteqarpoq.
- Danmarkip Tysklandillu killeqarfiata nunataa UNESCO-mut ukioq manna innersuussutigineqarpoq, aappaagumullu Namminersorlutik Oqartussat siunnersuutaat “Qilaatersorneq – grønlandsk trommedans og -sang” UNESCO-p allattuiffianut 2021-mi ilanngussassatut toqqarpara, kultureqarnermut ministeri oqarpoq.
- Qilaatersorneq tassaavoq ileqqutoqaq tulluusimaarutaasoq Kalaallit Nunaanni attatiinnarnissaanik sivisuumik sulissutigineqarsimasoq kinguaariinnut tullernut ingerlateqqinneqarniassammat, Mette Bock ullumi oqarpoq.
UNESCO-p nunarsuarmi eriagisassanut tigussaanngitsunut kingornutanut allattuiffianut ilanngussinissamut siullermeerluni qinnuteqartoqarmat Dansk Folkemindesamling aamma Det Kgl. Bibliotek qinnuteqaatip naammassineqarnissaanut ikiuunniarput qilaatersornerup UNESCO-p allattuiffianut Naalagaaffeqatigiinnerup ilanngussinissaanut periarfissat pitsaanerulersinniarlugit, Kultureqarnermut ministereqarfik oqaaseqarpoq.
