Namminersorneq ukiuni qulini: Qiimmatsassimaanermiit unittooqqanermut

Naalakkersuinikkut qiimmatsalluni isumalluamisaarnermiit iteriartaarnermut, unittooqqanermut neriunnermullu. Namminersorlutik Oqartussani ukiuni siullerni qulini peqataaginnavissimasut taama nassuiaateqarput.

Namminersornermut inatsit ataqqinartorsuarmit, Dronning Margrethemik ukiut qulit matuma siorna tunniunneqarmat ulloq immikkuullarilluinnartuuvoq.

Iterpugut soorlulusooq aperlaami illernit nutaat, kinguaatta aqqusaagassaat.

Namminersornermut inatsit naapertorlugu susassaqarfiit tiguneqarsinnaasut:

Nalunaarsukkat I Nunatta susassaqarfiit qaqugu tiguneqarnissaat nammineq aalajangigassaraa

a) Sulitilluni ajoqusernissamut sillimaneq

b) Peqqinnissamut tunngasut sinneri

c) Angallanneq

d) Pigisat pillugit inatsisit

e) Aqqartartoqarneq

 

Nalunaarsukkat II Susassaqarfiit Naalagaaffiup Namminersorlutik Oqartussallu akornanni isumaqatigiinniarnikkut tiguneqarsinnaasut

1) Pinerluttunik isumaginninneq

2) Pas

3) Politiit unnerluussisartullu aammalu pinerluttut pillugit inatsisit ilaat taakkununnga atasut

4) Eqqartuussiveqarneq pillugu inatsit, eqqartuussiviit pilersinnissaat ilanngullugit

5) Pinerluttut pillugit inatsisit

6) Nunanut allamiunut tunngasut killeqarfinnillu nakkutilliineq

7) Inuit pillugit inatsisit

8) Ilaqutariit pillugit inatsisit

9) Kingornussisarnerit pillugit inatsisit

10) Eqqartuussisorisut

11) Sakkunut tunngasut

12) Radiut atorlugit immakkut angalasunik ajutuulersunik kiffartuussissutit isumannaallisaanerillu

13) Radiut atorlugit attaveqarnermut tunngasut

14) Piginneqatigiinnermut, naatsorsuuserinermut kukkunersiuinermullu tunngasut

15) Nerisassanut neqilinnillu nakkutilliinermut tunngasut

16) Silaannakkut angallanneq

17) Atuakkianut, eqqumiitsulianut, assilissanut il.il. pilerseqqaakkanut piginnaatitaaneq

18) Pilersitseqqaartutut piginnaatitaaneq

19) Gymnasiani ilinniarnerit

20) Immakkut isumannaallisaaneq

21) Umiarsuarnik nalunaarsuineq inatsisillu immakkut angalasunut atuuttut

22) Nunap assiliorneq

23) Imaani nalunaaqutsersuineq, naaralaartitsiviit ilisimasortaqartarnerlu

24) Immami avatangiisit

25) Aningaasanut tunngasunik aaqqissuussineq nakkutilliinerlu

26) Aatsitassanut tunngasut

27) Sullivinni avatangiisit

Naalakkersuisunut siulittaasunngorlaaq, Kuupik Kleist juunip 21-at 2009-mi oqalugiarnermini taama oqarpoq.Taassuma ulloq nuannerluinnartutut kisianni naalakkersuisoqatigiinnissamut isumaqatigiinniaqqammernerit Inuit Ataqatigiit, Demokraatit Kattusseqatigiit Partiiatalu naalakkersuisooqatigiilerneranik kinguneqartoq, pissutigalugit aalassassimaarfittut aamma eqqaamavaa.

Ulloq nalliuttorsiorfiullunilu tussunngunartoq 

Namminersorneq pillugu inatsit pissutsit, nunani allarpassuarni nalinginnaalluinnartut, pillugit ukiorpassuarni isumaqatigiinniarnerit assortuunnerillu inernerivaa. Tassalu suunngitsuusaajugaluit,  pisuussutinut uumaatsunut piginnittussaaneq, nunanut allanut politikkimut sunniuteqarsinnaaneq kiisalu inuiaqatigiittut inuiaasutullu nammineq oqaasilittut piorsarsimassuseqartutullu akuerisaaneq.

- Ullaaq taanna soorunalimi attortinnartorujussuuvoq, aamma pisoqisuujugami. Kisianni aamma taassuma saniatigut ulaperujussuarnikuulluta suna tamarmi sukkasuumik ingerlavoq. Kisianni ullaaq taanna eqqaamasassaavoq inuuneq naallugu, Kuupik Kleist oqarpoq.

Namminersornerup atuutilerneratigut suliassaqarfinnut amerlanerusunut, soorlu assersuutigiinnarlugu politiinik, nunarput akisussaasunngorsinnaalerpoq, aammali akisussaaffinnik Danmarkimiit tigusinermi aningasanik tapiissutit amerlinissaannik periarfissani annaallugu. 

Susassaqarfiup aappaata affaa tiguneqartoq 

Aatsitassannut tunngasut sullivinnillu isumannaallisaanermut akisussaaffiup ilaa namminersornerup aallarteqqammilaaginnarnerani nunatta tiguai, tamatumali kingorna tiguseqqinnani. Ukiunilu qulini akisussaaffeqarfinnik taama tigusakitsiginerput, namminersorneq pillugu isumalioqatigiititami atorfilittaasup pikkornartutut isiginngilaa:

- Suu, annertunngillat, Jakob Janussen oqarpoq.

Taanna assigiinngitsunit taperserneqarpoq.

- Ikigisassaapput. Kisianni tassa aamma tassani pissutaavoq, isertitassatigut ineriartortitsineq sukkaappallaaqimmat, Lars-Emil Johansen, namminersorneq pillugu kalaallit qallunaallu isumalioqatigiititaanni ilaasortaasoq, oqarpoq.  Aamma namminersornermi siuttoq siulleq siuariarnernik amerlanernik maqaasivoq.

- Isumaqarpunga angorusutavut, taamanikkulli anguneqarsinnaasutut takorluukkavut, annertunerpaamik piviusunngorsimanngitsut ajuusaarnaraluartumik. Aammalu piffissaq qaangiuttoq naalakkersuinikkut eqqisisimannginnermik ilisarnaateqartoq, Kuupik Kleist oqarpoq.

Aningaasat ataqatigiinnerlu Nunatsinnik siuariartitsisinnaasut

Taamani pitsanngorsaanissaq nunattalu ineriartornissaa neriuutaallunilu upperineqartoq angutit pingasut isumaqatigiissutigaat, aammali maanna killiffitsinniit nunarput nikeriaqqissappat, piumasaqaat annerusuusoq ilisimaarivaat.

Nunarput suli namminersortutut naalagaaffiunngimmat susassaqarfiit tiguneqarsinnaanngitsut.  

  • Naalakkersuinikkut aaqqissuussineq
  • Naalagaaffimmi innuttaassuseqarneq
  • Eqqartuussiviit Qullersaat
  • Nunanut allanut politikki
  • Sillimaniarnermut illersornissamullu politikki
  • Nunap aningaasaatai aningaasanullu politikki

Kuupik Kleistip ukiut qulit matuma siorna oqaatigisani ullumikkut oqaatigeqqiinnarsinnaasorai.

- Ataatsimoortariaqarneq. Aamma suliassat ajornartorsiutitut qaangerniagassat aaqqissaganni, taava periarfissatuaavoq ataatsimoorneq avissaartuunnerunngitsoq, taanna oqarpoq.

Lars Emil Johansenip isumalluutinik atorluaanermut pikkorinnerulernissarput tikkuarpaa, taamaalilluta susassaqarfinnik amerlanerusunik tigusinissatsinnut aningaasassaqalissagatta.

- Aningaasarsiorfissanik allanik pissarsiornissaq pimoorunneqarnerusariaqarsoraara ullormikkornit, taanna oqarpoq

Namminersornerup atuutilerneraniit maannamut ineriartorneq pillugu Naalakkersuisunut  maanna siulittaasuusumik, Kim Kielsenimik, KNR aperuiniarluni sulivoq, TAmannali maannamut suli iluatsinngilaq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat