Qiiaammisaarnartuliaq takuteqqaarneqangajalerpoq

33-nik ukiulik Malik Kleist, nipilersoqatigiinni Chilli Friday-ikkunni erinarsortartutut ilisimaneqarnerugunartoq, filmimi ilitsersuisuuvoq.

Malik Kleistilli filmiliorneq nammineq filmiliortarfimmini, Tumit Productionimi, ukiuni kingullerni sammisarisimavaa, soorlu filmi nuannarineqaqisoq, Hinnarik, tassani siorna suliarineqarpoq.

Malik Kleistilu filmimik qiiaammisaarnartuliamik maanna filmiliorsimalerpoq, filmimik pissanganartuliamik Kalaallit Nunaanni pernaammik suliaqartoqarluni.

Ilinniarnertuunngorlaat arfinillit kangerlummi illuaqqamukarput. Nassuiarneqarsinnaanngitsunik pisoqallattaalerpoq, inuusuttut toqqissisimajunnaarput, aarillumi, qivittumik takkuttoqariataarpoq! Inuusuttummita qassit ajoratik angerlamut apuuppat? Filmimi tamanna paasiumaarpat!

Kalaallit inuusuttut isiginnaartitsisartut uummaarissut filmimi inuttaapput - ilaat misilittagaqarput - allalli aamma aatsaat misiliillutik. Filmi sapaatip-akunnerani arfinilinni suliarineqarpoq, 2 millionit koruuninillu akeqarsimalluni.

Filmiliaq "Iliveq" taaguutigalugu aallartippoq. Killiffik pillugu Katuami ippassaq tusagassiortunik katersortitsisoqarmat filmip taaguutivissaa, qaqugu takuteqqaarneqarnissaa, plakatitassaa, takoqqusaarusiaq allallu saqqummiunneqarput.

Filmi Nuummi Kulturikkut Illorsuarmi Katuami juunip ulluisa pingajuanni takuteqqaarneqassaaq - qiiaammisaarusukkussi!