Qiiaammisaarnartuliaq japaniut filmiliaannut assersuuppaat
Isiginnaariat ilaat Makkak ima naliliivoq:
- Naatsorsuutigisannit assut tupaallannalaartumik inuusuttunut tulluartippara, pissanganarpoq. Filmi aallartinneraniit naanissaata tungaanut, quianartortaqarlunilu tupaallannartortaqarluni assut ilimagisanninngaanniit nuanninaarpara.
- Pipaluk torrageqaara tupaallannartorujussuuvoq, pikkorinaaqaakka taakku ilaasut.
Ivinnguaq Storch ima naliliivoq:
- Assut alutornartupilussuuvoq ingammik taamatut kalaallisut gyserimik isiginnaarluni, alutornaqaaq... nersugassaapput.
Filmi tusagassiorfinnut takuteqqaarneqarmat Maren Louise Poulsen Nuuk TV-meersoq najuuppoq:
- Suliarinera torraqaaq. Japanimiut qiiaammisaarnartuliaannut assersuunneqarsinnaavoq. Kisianni kulturerput ilisarineqarsinnaalluni, Maren Louise Poulsen oqarpoq.
Isiginnaagassiaq inunnit katillugit 50-init suleqataaffigineqarsimasoq, filmiliarinera katillugu aningaasanik 2,1 millionit koruuninik naleqarsimasoq Katuami kikkunnit tamanit sisamanngorpat juunip sisamaanni takuneqarsinnaalissaaq.
