"Qiaqatigiissinnaaneq" Filminut nersornaasiinermi nersornaaserneqarpoq
Nordisk Rådip Filminut 2007-imi nersornaasiinerani, danskit filmiliaat “Kunsten at græde i kor” (kalallisut immaqa taasinnaaasarput: qiaqatigiissinnaaneq) Peter Schønau Fog-imit ilitsersuisuuffigineqartoq, nersornaaserneqarpoq.
oktobarip 09-at 2007 12:00
Filmi “Kunsten at græde i kor” aamma Danmarkimit Oscarinnattussatut innersuussutigineqarpoq.
Filmiliortartut Torontomi siorna katersuunneranni filmi takuteqqaarneqarpoq, taamanimiillu nunat tamalaat akornanni filmiliortartut naapinnerini 15-eriarluni nersornaatisereerpoq. Filmi Danmarkimi filmeriartarfinni upernaarmanna apriilimi takuteqqaarneqarpoq, nunatsinnili suli takutinneqarani.
Filmimi tunngavigineqarpoq Erling Jepsenip atuakkiaa nuannarineqaqisoq filmimut ateritinneqartoq, tassani oqaluttuarineqarluni, Jyllandip Kujataani nunaannarmi illoqarfinnguami ilaqutariinni qanigivallaakkamik atoqateqartarnermik oqaluttuaq annernartoq.
”Kunsten at græde i kor” tassaavoq Peter Schønau Fogip aliikkutassiatut filmiliaa siulleq.
