Qernertat siunissaat nalunartoq

Nalunaarusiaq kingulleq naapertorlugu Qimusseriarsuarmi ukiut kingulliit 30-t ississimaqaaq. Minutsillu 20-kkaarlugit qilalukkat anersaariartortarmata nerisassarsiornerminni nikingaartarnavianngillat.

Uumasut quppanik ammanersanillu aalajangersimasuniittunik pisariaqartitsisarput, qilalukkallu itisuumi neriniarlutik qaleralinnik nerinialuffigisinnaasaminnik aqqarfeqartariaqarput. Qimusseriarsuarmi sikup issutsissimanerata pisariaqartilerpaa qilalukkat ammanersanik ujaasisariaqalernerinik. Qilalukkat minutsini 20-ni aqqarsimareerlutik nerisassarsiornerminni ammanersanut anersaariartortariaqartarput. Ilisimavarput qilalukkat ammanersani sassannguullutik katersuukkaangamik, annerusumik Qeqertarsuup Tunuani, sikkussaagaangamik toqorartartut.

Eqqaamasariaqarporlu Qimusseriarsuarmi qaleralinniarnissamut piukkoorfiusumi qilalukkattaaq neriniartarfigimmassuk. Annermik siku issutillugu mianersuuttariaqarpoq qaleralinniarnerup annertuallaannginnissaa, taamaalilluni qilalukkat qalerallilluunniit pingaarnerutissanerlugit eqqarsaatigisariaqarpoq.

Ilisimaneqanngilaq ukiuni kingullerni Nunarsuup sinnerani kissatsikkiartortoq, Qimusseriarsuarmi sooq nillernerulersimanersoq. Qimusseriarsuulli avinngarusimanera pisooqataaratarsinnaavoq. Eqqoriaanerit ilagaat sermersuup aanneragut sarfaq kissartoq Golfi tunumiit illuartikkiartoraa. Paatsuunganeq annertusarniarlugu ukiuni kingullerni silaannaq kissatsikkiartorsimavoq, ilisimatuulli oqaatigisinnaanngilaat taamaaginnassanersoq.